"Sabah" azarkeşləri Bakıda danimarkalılara hücum etdilər - İDDİA

“Sabah” və “Orhus” komandaları arasında keçiriləcək UEFA Çempionlar Liqasının III təsnifat mərhələsinin cavab oyunu öncəsi insident yaşanıb.

Sport1.az xəbər verir ki, “Orhus”un azarkeşləri “Bank Respublika Arena”ya gələrkən hücuma məruz qalıblar.

Bu barədə Danimarkanın “Bold” nəşri məlumat yayıb.

Mənbənin iddiasına əsasən, təxminən 175 danimarkalı tərəfdar mikroavtobuslarla stadion ərazisinə gətirilib. Onlardan bir qismi nəqliyyat vasitələrindən düşərkən qara geyimli 40-50 nəfərlik “Sabah” azarkeş qrupunun hücumuna məruz qalıb.

Şahidlərdən birinin sözlərinə görə, hadisə zamanı təhlükəsizlik əməkdaşlarının böyük hissəsi ərazidən bir neçə yüz metr uzaqda olub. Bu səbəbdən polisin müdaxiləsi bir neçə dəqiqə gecikib.

Nəticədə “Orhus” azarkeşləri stadionun girişinə doğru geri çəkilib. Daha sonra polis vəziyyətə nəzarəti təmin edib. İnsident zamanı Danimarka təmsilçisinin bir azarkeşinin gözünün üst nahiyəsindən xəsarət aldığı bildirilib.

Qeyd edək ki, stadionda təhlükəsizliyin təmin olunmasına 150-dən çox əməkdaş cəlb edilib. Həmçinin ərazidə hərbçilər də xidmət aparıb. “Orhus” azarkeşlərinin yerləşdirildiyi sektorun digər tribunadan tam ayrılmadığı da vurğulanıb.