Son iki ildə avrokuboklara təsadüfən vəsiqə qazanmamışıq - "Zirə"nin üzvü

Misli Premyer Liqasının 21-ci turunda “Turan-Tovuz” “Zirə”ni məğlub etdi – 2:0.

Sport1.az xəbər verir ki, qarşılaşmadan sonra “Qartallar”ın üzvü Tiaqo Silva jurnalistlərin suallarını cavablandırıb.

Həmin müsahibəni təqdim edirik.

– Oyun haqqında fikirləriniz maraqlıdır...

– İlk 15-20 dəqiqədə “Turan-Tovuz” oyuna bizdən daha üstün başladı. Açığı, start istədiyimiz kimi alınmadı. Buraxdığımız iki qoldan sonra toparlanmağa çalışdıq. İkinci hissədə nisbətən üstünlüyü ələ alsaq da, bu cür vəziyyətdə rəqib komanda müdafiədə daha diqqətli oynayır. Az sayda qol epizodlarımız oldu, amma onları dəyərləndirə bilmədik. Ümumilikdə isə meydanda daha aqressiv və istəkli tərəf rəqib idi. Qələbəni də onlar qazandı.

– Hər iki qol eyni cinahdan vuruldu. Müdafiədə problem var?

– Belə olduğunu düşünmürəm. Bu cür qolları ilk dəfə buraxmırıq, əvvəllər də oxşar situasiyalar olub. Sadəcə, hazırkı mərhələdə buraxdığımız qolları düzgün təhlil edib, çatışmazlıqları aradan qaldırmalıyıq. Qarşımıza avrokubok məqsədi qoymuşuq və bu hədəfə çatmaq üçün inkişaf etməyə davam etməliyik.

– “Sabah”la oyunda da erkən qol buraxmışdınız. Komandada konsentrasiya problemi var?

– Dediyim kimi, bu gün daha aqressiv olan tərəf qalib gəldi. Son iki ildə avrokuboklara təsadüfən vəsiqə qazanmamışıq. Oyunlarda göstərdiyimiz aqressiya, topsuz oyunda pressinq və mübarizə əzmi bizə çox kömək edib. Bu gün isə həmin aqressiya çatmadı. Bunun üzərində işləyib növbəti qarşılaşmalarda daha fərqli və daha istəkli çıxış etməliyik.

– Növbəti turda “Araz-Naxçıvan”la qarşılaşacaqsınız. Oyun barədə düşüncələriniz?

– 100 faiz qələbə qazanmalıyıq. Hər oyunda daha aqressiv və daha istəkli olsaq, bu günkündən fərqli mübarizə göstərsək, növbəti matçda qalib gələ bilərik.

MƏHƏMMƏD HÜSEYNOV