“Nyukasl” favoritdir, amma...” – Mütəxəssisdən diqqətçəkən açıqlama
UEFA Çempionlar Liqasının pley-off mərhələsinin ilk oyununda “Qarabağ” doğma meydanda “Nyukasl”ı qəbul edəcək.
Ağdam təmsilçisini çətin sınaq gözləyir. İngiltərə Premyer Liqası təmsilçisi hazırda müəyyən eniş yaşasa da, səviyyəli kollektiv hesab olunur və matçın favoriti kimi göstərilir.
Görəsən, “köhlən atlar” doğma meydanda üstün nəticə əldə edə biləcək?
Sualımızı Arif Əsədova yönəltdik. Tanınmış futbol mütəxəssisi Sport1.az-a açıqlamasında bunları dedi:
“Bu gün “Qarabağ”ı çətin oyun gözləyir. “Nyukasl” Premyer Liqa komandasıdır və müəyyən çətin dövr yaşasa da, kifayət qədər səviyyəli kollektivdir. Təbii ki, favorit kimi göstərilir. Amma “Qarabağ”ın da üstün cəhətləri var. Komandanın oturuşmuş heyəti və oyun sistemi formalaşıb. Üstəlik, evdə oynayırıq və azarkeş dəstəyi böyük amildir. Məncə, stadionda anşlaq olacaq.
Rəqib son dönəmlərdə xüsusilə müdafiədə boşluqlara yol verir. Düşünürəm ki, məşqçilər heyəti bunları təhlil edib. Bu baxımdan xal qazanmaq üçün real şans var. Əsas məsələ komandanın verilən tapşırıqları intizamla yerinə yetirməsi və standart vəziyyətlərdə diqqətli olmasıdır.
Gözləntim müsbətdir. Hesab edirəm ki, “Qarabağ” bu oyunda uduzmaya bilər. Ən azı heç-heçə mümkündür, hətta qələbə də real variantdır”.
ZƏFƏR HACILI
