Daxili münaqişə içində olan "Şəfa", stabil "Səbail", güclənən "Mingəçevir" - YAZI

I Liqada qış fasiləsi başa çatır.

Bu gün keçiriləcək 3 oyunla 13-cü tura start veriləcək. İlk 12 həftədən sonra formalaşan turnir cədvəli liderlərlə autsayderlər arasında ciddi fərqi ortaya qoydu. Amma qış fasiləsində baş verənlər bəzi komandaların taleyini dəyişə bilər.

Hazırda 30 xalla zirvədə qərarlaşan “Şəfa” favorit hesab olunsa da, komandanın daxilində baş verən proseslər liderin mövqeyini təhlükə altına salır. Klubun baş məşqçisi Elgiz Kərəmli ilə prezidentin müşaviri Əfran İsmayılov arasında yaranan soyuqluq artıq gizli deyil. Daxili ziddiyyətlərin davam etməsi “Şəfa”nı tədricən uçuruma apara bilər. İdarəetmədə çatların olması çempionluq mübarizəsinə təsirsiz ötüşməyəcək. Bu səbəbdən liderin büdrəməsi real ssenari kimi görünür.

Turnir cədvəlində ikinci pillədə qərarlaşan “Baku Sportinq” isə qış fasiləsində gözlənilən güclənməni həyata keçirə bilmədi. Transfer bazarında passivlik Bakı təmsilçisinin əsas rəqiblərlə mübarizədə geridə qalmasına səbəb ola bilər.

“Səbail” isə əksinə, qış fasiləsindən maksimum faydalanan klublardandır. Komanda ehtiyacı olan mövqeləri gücləndirərək balanslı heyət formalaşdıra bildi. Hazırda 22 xalla ilk üçlükdə yer alan “dənizçilər” çempionluq yarışında sona qədər mübarizə aparacaq əsas namizədlərdən biridir.

Zirvəyə ən real iddialılardan biri isə “Mingəçevir”dir. Qış fasiləsində klub tərəfindən səs-küylü transferlər həyata keçirildi. Premyer Liqa səviyyəli futbolçular heyətə cəlb olundu Amil Yunanov, Fuad Bayramov və Bahadur Həziyev kimi təcrübəli futbolçuların keçidi komandanı çempionluğa apara bilər.

I Liqanın taleyinə birbaşa təsir edə biləcək digər komandalar isə "Ordu" ilə “Şahdağ Qusar” ola bilər. "Hərbçilər"in 1 milyon manata yaxın büdcəsi olduğu heç kimə sirr deyil. Heyətə cəlb olunan əcnəbi futbolçular komandaya fərqli status qazandıra bilər. “Şahdağ Qusar” isə yeni sponsor tapmaqla maliyyə baxımından “nəfəs aldı” və bu faktor ikinci dövrədə uğurlu nəticələrin qazanılmasına kömək olacaq.

Bu gün keçiriləcək 13-cü turun oyunları da çempionatın gələcək taleyi baxımından xüsusi əhəmiyyət daşıyır. Həftənin mərkəzi qarşılaşması Binədə lider “Şəfa” ilə “Baku Sportinq” arasında baş tutacaq. Lider məğlub olduğu təqdirdə aradakı fərq 2 xala düşəcək. Zaqatalada isə “Səbail” çətin səfərdə yerli komandanın qonağı olacaq. Şamaxıda keçiriləcək “Cəbrayıl” – "Ordu" görüşü isə autsayderlər zonasına ciddi təsir göstərə bilər.

NİHAT KƏRİMLİ