"Neftçi" idman prinsiplərinin pozulmasını istəmir – YAZI

Premyer Liqanın 21 turunun başlamasına ən azı 2 həftə var, amma “Neftçi” – “Qarabağ” oyunu indidən müzakirə mövzusudur.

“Köhlən atlar” Çempionlar Liqasının pley-off matçlarını əsas gətirərək görüşün təxirə salınmasını istəyir. Flaqman isə buna açıq şəkildə etiraz edir.

Niyə? “Ağ-qaralar” hazırda 24 xalla turnir cədvəlinin 7-ci pilləsində qərarlaşıb. Onları üçüncü pillədən cəmi 6 xal ayırır. Bu, artıq ciddi siqnaldır. Komanda avrokuboklara vəsiqə qazana bilər. Hər oyun hesab-kitabdır, hər qazanılan xal mövqenin yaxşılaşdırılmasıdır. Belə məqamda oyunun təxirə salınması “Neftçi” üçün yalnız riskdir. Bu, özünə quyu qazmaqdan başqa bir şey deyil.

Sual isə sadədir: Premyer Liqada hansısa klub üçün ayrıcalıq var? Əsasnamədə göstərilir ki, yox! O zaman mövzunun uzanmasının səbəbi nədir? Mövsümün əvvəlində təqvim elan olunub və bütün klublar bununla razılaşıblar. Avropada heç bir ciddi liqada “bizim avrokubok oyunumuz var” deyənlərin çempionat oyunları təxirə salınmır. Böyük futbol elə budur. Sən eyni anda bir neçə cəbhədə mübarizə aparmalısan 

“Qarabağ” üçün bu vəzifə çətin olmamalıdır. Komanda illərdir avrokuboklarda çıxış edir, geniş heyətə malikdir və bu tempə öyrəşib. İndi bu məqamı fövqəladə hal kimi təqdim etmək gülüncdür. Bu oyun təxirə salınsa, sabah digərləri PFL-dən, AFFA-dan başqa güzəştlər istəyəcəklər. Nəticə çempionatımız olacaq uşaq oyuncağı. 

“Neftçi" üstünlük axtarmır. Klub bərabərlik istəyir. Bakı təmsilçisi idman prinsiplərinin pozulmasının tərəfdarı deyil. Qayda hamı üçündür və hamıya eyni cür tətbiq olunmalıdır. Futbolda ədalət kabinetlərdə yox, meydanda təmin olunur...

MƏHƏMMƏD HÜSEYNOV