Fevral "Qarabağ" üçün ağır keçəcək – YAZI

Son günlər hamı Premyer Liqanın 21-ci turunda "Qarabağ"ın “Neftçi” ilə oyunun təxirə salınıb-salınmamasını müzakirə edir. 

Lakin bu müzakirə adi söz-söhbət mövzusu deyil. Burada söhbət daxili çempionat oyunundan yox, Azərbaycanın Avropadakı taleyindən gedir. “Qarabağ” UEFA Çempionlar Liqasında ölkəni təkbaşına təmsil edir. Belə məqamda komandaya bir az anlayış göstərmək çox çətindir?

“Qarabağ”ın müraciəti tamamilə məntiqlidir. Komanda pley-off mərhələsində son dərəcə ağır və uzun səfərdən öncə daha düzgün hazırlaşmaq istəyirdi. Söhbət adi bir Avropa oyundan yox, 6-7 saatlıq uçuş, yüksək temp, maksimum fiziki və psixoloji yüklənmə tələb edən matçdan gedir. Üstəlik, cavab qarşılaşmasının 120 dəqiqəyə, hətta penaltilərə qədər uzanma ehtimalı da az deyil. Yəni bu, “get, oyna, qayıt” səfəri deyil.

“Neftçi”nin bu xahişi rədd etməsi çoxlarını təəccübləndirdi. Axı söhbət “Qarabağ”dan gedir – Azərbaycan futbolunun Avropadakı simasından. Bu komanda təkcə öz uğuru üçün yox, bütün ölkənin futbol nüfuzu üçün mübarizə aparır. Belə məqamda rəqiblik bir kənara qoyulmalı, milli maraqlar önə çəkilməli idi.

Bu qədər sıx qrafikdə komandaya bir az dəstək olmaq, ən azı anlayış göstərmək lazımdır. Rəqabəti başa düşürük. Amma bu, ölkənin adının Avropada tanıdılmasıdır. “Qarabağ” uduzanda da, udanda da Azərbaycanın adı çəkilir. 

“Neftçi” ilə matç isə Bakıda keçirilir. “Qarabağ” yorğun olsa da, derbidə yenə öz sözünü deməyə gücü çatacaq. Ağdamlıların bu istəyi nə kapriz, nə də üstünlük qazanmaq cəhdidir. Bu, sağlam düşüncənin, peşəkar yanaşmanın nəticəsidir. Təəssüf ki, cavab istənilən olmadı. Amma "köhlən atlar" sözünü meydanda deyəcək. "Qarabağ" çətinlikdən qorxan klub deyil. Sadəcə, bu dəfə yük həqiqətən həddindən artıqdır. Fevral çox ağır keçəcək. "Qarabağ" bu qrafikdən “sağ çıxsa”, deməli, komanda həqiqətən böyük iş görmüş olacaq.

ZƏFƏR HACILI