Çempionlar Liqasında pley-off mərhələsinin püşkü atıldı
UEFA Çempionlar Liqasında pley-off mərhələsinin bütün cütləri müəyyənləşib.
Sport1.az xəbər verir ki, İsveçrənin Nyon şəhərində keçirilən püşkatma mərasimindən sonra 1/8 finala gedən yolda üz-üzə gələcək komandalar bəlli olub. Əsas mərhələni 9–24-cü pillələrdə başa vuran klublar pley-offda mübarizə aparacaq.
Azərbaycanı turnirdə təmsil edən “Qarabağ” bu raundda İngiltərənin “Nyukasl” klubu ilə qarşılaşacaq. Ağdam təmsilçisi ilk oyunu Bakıda keçirəcək, cavab görüşü isə səfərdə baş tutacaq.
Pley-off mərhələsinin bütün cütləri aşağıdakılardır:
“Qarabağ” – “Nyukasl”
“Monako” – PSJ
“Qalatasaray” – “Yuventus”
“Benfika” – “Real Madrid”
“Borussiya Dortmund” – “Atalanta”
“Brügge” – “Atletiko Madrid”
“Bodo-Qlimt” – “İnter”
“Olimpiakos” – “Bayer Leverkuzen”
Qeyd edək ki, pley-off mərhələsinin ilk oyunları 17–18 fevral, cavab görüşləri isə 24–25 fevral tarixlərində keçiriləcək. Bu raundun qalibləri Çempionlar Liqasının 1/8 final mərhələsinə vəsiqə qazanacaqlar.
