“Liverpul” cəbhəsindən “Qarabağ”ı narahat edən xəbər

İngiltərənin “Liverpul” klubunun baş məşqçisi Arne Slot bu gün UEFA Çempionlar Liqasının əsas mərhələsinin VIII turunda “Qarabağ”a qarşı keçirəcəkləri oyunun start heyətində məcburi dəyişikliyə gedəcək.

Sport1.az xəbər verir ki, mersisaydlıların rəsmi saytında yer alan məlumata əsasən, Co Qomes Premyer Liqada “Bornmut”la görüşdə zədələnib və oyunu yarımçıq tərk edib. Slot müdafiəçinin bu gün meydana çıxa bilməyəcəyini təsdiqləyib.

Mərkəz müdafiəsində vəziyyət daha da çətinləşib. İbrahima Konate şəxsi səbəblərdən, Covanni Leoni isə dizindən aldığı zədə üzündən bu matçın heyətindən kənarda qalacaq. Bu səbəbdən Slotun həmin mövqedə dəyişiklik etməsi qaçılmazdır.

“Bornmut”la oyunda Vircil van Deykin yanında mərkəz müdafiədə Vataru Endo çıxış edib. Yaponiya millisinin kapitanı həmin görüşdə 34-cü dəqiqədə Co Qomesi əvəzləməklə 6 dekabr 2025-ci ildən sonra ilk dəfə “Liverpul”un formasında meydana çıxmışdı. Endonun bu dəfə də eyni mövqedə istifadə olunması ehtimallar sırasındadır.

Heyət seçiminin yalnız adlarla bağlı olmadığını vurğulayan Slot taktiki məqamların da rol oynayacağını bildirib: “Sabah mərkəz müdafiəsində təbii mərkəz müdafiəçisi olmayacaq, çünki bu mövqedə başqa oyunçumuz yoxdur və yarımmüdafiəçidən istifadə etməli olacağıq”.

Komandanın hücum xəttində də bəzi rotasiya ehtimalları var. Federiko Kyeza son iki oyunu buraxsa da, matç ərəfəsində məşqlərdə iştirak edib. Uqo Ekitikenin isə “Bornmut”la oyunda ehtiyatda qalmasından sonra start “11-liy”ə qayıtması mümkündür. Slot bunu belə əsaslandırıb: “Ekitike zədə səbəbindən iki həftə oynamadı, sonra isə ardıcıl çox oyun keçirməli oldu. Növbəti aylarda yalnız bir "9 nömrə" hücumçumuz olduğu üçün yükü onun üzərindən bir qədər azaltmaq məntiqli göründü”.

Komandanın itkiləri bununla da bitmir: Konor Bredli və Aleksandr İsak uzunmüddətli zədə səbəbindən sıradan çıxıblar. Körtis Cons isə ötən tur “Marsel”lə səfər görüşündə (3:0) sarı vərəqə görsəydi, növbəti Çempionlar Liqası oyununu buraxacaqdı.

Qeyd edək ki, “Liverpul” artıq ən azı pley-off mərhələsini təmin edib. “Qarabağ” üzərində qələbə isə 1/8 finala birbaşa vəsiqəni rəsmiləşdirə bilər. Oyun bu gün “Enfild” stadionunda Bakı vaxtı ilə saat 00:00-da başlayacaq.