Şotlandiyada hakim matç zamanı azarkeşə qırmızı vərəqə göstərdi
Şotlandiyada futbolla bağlı maraqlı və nadir hadisə baş verib.
Sport1.az xəbər verir ki, “The Sun” nəşrinin məlumatına görə, bu ölkənin İkinci Liqasında keçirilən “Edinburq Siti” – “Sterlinq Albion” oyunu zamanı hakim bir azarkeşə qırmızı vərəqə göstərib.
Hadisə “Medobank” stadionunda baş tutan qarşılaşmanın 86-cı dəqiqəsində yaşanıb. Matç boyu tribunada səs-küy salan və qayda pozan azarkeş hakimin diqqətini çəkib. Baş hakim Coş Hey tribunaya yaxınlaşaraq həmin azarkeşi birbaşa qırmızı vərəqə ilə cəzalandırıb.
Bu qeyri-adi qərar tribunadakı digər azarkeşləri təəccübləndirib. Hadisə qısa müddətdə sosial şəbəkələrdə gündəmə çevrilib. Bir çox istifadəçi baş verənlərə yumorla yanaşıb, bəziləri isə zarafatla VAR sisteminin işə salınmasını təklif edib.
