Neymarın “Santos”dakı taleyi bəlli oldu
Braziliyanın “Santos” klubu ulduz futbolçusu Neymarla müqavilənin uzadıldığını açıqlayıb.
Sport1.az xəbər verir ki, A Seriyası təmsilçisinin rəsmi saytında yayımlanan məlumata əsasən, tərəflər arasında imzalanan yeni anlaşma 2026-cı ilin sonuna qədər qüvvədə olacaq. Müqavilənin maliyyə detalları açıqlanmayıb.
33 yaşlı vinger 2025-ci ilin yanvarında peşəkar karyerasına başladığı “Santos”a geri dönmüşdü. Neymar 2025 mövsümündə bütün turnirlərdə 28 oyunda 11 qol vurub və 4 məhsuldar ötürmə edib. Onun əvvəlki müqaviləsi 2025-ci ilin dekabrın 31-də başa çatırdı.
Hazırda zədəli olan futbolçu bərpa prosesini davam etdirir və 2026-cı il Dünya Çempionatında iştirak etməyi hədəfləyir.
Qeyd edək ki, Neymar daha əvvəl “Barselona” və PSJ klublarının da formasını geyinib.
