Roberto Karlos əməliyyatdan sonra danışdı
“Real” və Braziliya millisinin sabiq üzvü Roberto Karlos ürəyindən əməliyyat olunması ilə bağlı yayılan xəbərlərə münasibət bildirib.
Sport1.az xəbər verir ki, əfsanəvi veteran futbolçu tibbi müdaxilənin əvvəlcədən planlaşdırıldığını və hazırda özünü yaxşı hiss etdiyini açıqlayıb. O, sosial şəbəkə hesabında yayılan məlumatlara aydınlıq gətirib:
“Bu yaxınlarda tibbi komandamla əvvəlcədən planlaşdırılmış profilaktik prosedurdan keçmişəm. Prosedur uğurla başa çatıb və özümü yaxşı hiss edirəm. Ürək tutması keçirməmişəm.
Bərpa prosesi normal gedir və tezliklə tam fiziki formaya qayıdaraq həm peşəkar, həm də şəxsi fəaliyyətlərimi davam etdirməyi səbirsizliklə gözləyirəm. Göstərilən dəstək, qayğı və xoş sözlər üçün hər kəsə səmimi təşəkkürümü bildirirəm. Narahat olmağa heç bir əsas yoxdur”.
Qeyd edək ki, Roberto Karlos futbolçu karyerasını 2016-cı ildə başa vurub. O, müxtəlif illərdə “Unyon San-Juan”, “Atletiko Mineyro”, “Palmeyras”, “İnter”, “Real”, “Fənərbağça”, “Korintians”, “Anji” və “Delhi Dinamos” klublarının formasını geyinib. Braziliya millisində isə 127 oyunda meydana çıxan sabiq müdafiəçi 11 qola imza atıb.
