İlin taxta medalçıları
2025-ci ildə Azərbaycan futbolunda maraqlı hadisələr yaşandı.
"Qarabağ" Çempionlar Liqasında yenidən əsas mərhələyə vəsiqə qazandı. Legioner limiti ləğv olundu.
Əslində bu hadisələri nəzərə almasaq, Azərbaycan futbolunda 365 günü Yerin Günəş ətrafında fırlanması kimi xarakterizə edə bilərik.
İlin bu vaxtlarında bir çox media qurumları ən yaxşıların adlarını açıqlayırlar. Uzun müddət əməkdaşı olduğum "Futbol+" qəzeti "ilin ən yaxşı futbolçusu"nu seçir. "Komanda.az" saytı "ilin ən yaxşı baş məşqçisi"nin adını açıqlayır.
Sport1.az olaraq "İlin taxta medalçıları"nı - ən pislərini seçmək qərarına gəldik. Açığı, sorğu etmək istəyirdik. Lakin avtosenzuralı cəmiyyətdə bu cür səsvermədə iştirak edənlərin olacağına inanmadıq.
Həm də "İlin taxta medalçıları" layihəsi satirik yanaşmadır. Fikirlərin çoxluğu yumurun keyfiyyətinin azalmasına səbəb ola bilər.
Hər nəysə! 11 nominasiyamız var. Düşünürük ki, seçimlərimiz düzgün və ədalətlidir. Kiminsə haqqına girməmişik.
* İlin ən pis baş məşqçisi - Adil Şükürov
Təbii ki, azarkeşi "razborka"ya çağıran, yeni "Kəpəz" formalaşdıra bilməyən, I Liqada 2-ci pillədə qərarlaşan "Səbail"i gələn kimi üçüncü etməyi bacaran məşqçi diqqətimizdən kənarda qala bilməzdi.
* İlin ən pis klubu - "Karvan - Yevlax"
Yevlax təmsilçisinin hazırda iki baş məşqçisi var. Azər Həşimovla rəsmi olaraq yollar ayrılmayıb. Hazırkı çalışdırıcı Füzuli Məmmədovu ictimaiyyətə təqdim edə bilmirlər. "İlin ən pis klubu" adına layiq olmaq üçün bundan artığını etmək olmazdı.
* İlin ən pis futbolçusu - Adil Nağıyev
Öz komandasının məğlubiyyətinə mərc edən şəxs pislərin şahıdır.
* İlin ən pis qapıçısı - Kasper Roşa
Dosta güvən verməyən, yadları sevindirən ad. Bərbad komanda formalaşdırmaq istəyirsinizsə, bu ad sizin ilk seçiminiz ola bilər.
* İlin ən pis hücumçusu - Renat Dadaşov
Rəsmi olaraq 2025-ci ildə 3 komandada - "Ankaragücü", "Radomiyak" və "Motor"da çıxış edən millimizin üzvü cəmi 2 qol vurmağı bacarıb. Rəqib müdafiəçiləri heç cür narahat etməyən Renatdan başqa kimsə bu ada layiq ola bilməzdi.
* İlin ən pis hakimi - İnqilab Məmmədov
Əminik ki, Premyer Liqada çıxış edən 12 komandadan 10-nu bu seçimlə razıdır. Onların ən azı 1 dəfə İnqilab Məmmədovla bağlı pis xatirəsi var.
İlin ən pis transferi - "Kəpəz"dən Azər Bağırovun göndərilərək Adil Şükürovun gətirilməsi
Daha sonra A.Şükürovun qovularaq yerinə A.Bağırovun təyin edən "Kəpəz"in İdarə Heyətində hazırda çalışan, çalışmış bu şəxsləri taxta medalla təltif edirik.
* İlin ən pis funksioneri - Kənan Kərimov
Baş məşqçi olmaq eşqi ilə alışıb-yanan, amma kateqoriya ala bilməyən, vitse-prezident vəzifəsini icra edə bilməyən şəxs ölkədə özünə rəqib tanımır.
* İlin ən pis stadionu - Yevlax Şəhər stadionu
Təsəvvür edin ki, media sektorunda oturduğumuz stulları oyun bitəndən sonra mətbuat konfrası otağına aparırıq. Azarkeşlər təbii ehtiyatlarını ödəməyə normal yer tapa bilmirlər. "Ot örtüyünə necə PRO lisenziyası verilib?" sualına hələ də cavab tapılmır.
* İlin ən pis qurumu - AFFA
Bəh-bəhlə ictimaiyyətə təqdim olunan İnkişaf Strategiyası ilə bağlı hansısıa ciddi addım atılmayıb. Milli komanda 2025-ci ildə qələbə üzünə həsrət qalıb. Başqa sözə ehtiyac var?!
Qalibləri təbrik etmirik. Ümid edirik ki, bu ili özləri üçün boşa keçmiş sayarlar və qarşıdakı 365 gündə inkişafları yönündə addımlar atarlar.
Bəli, bu yazı satiradır. Amma sözü də zarafatda deyərlər. Lakin biz yazdıqlarımızda tam ciddiyik!
