Ofsayd qaydası dəyişir? FIFA yeni modeli nəzərdən keçirir

FIFA növbəti mövsümdən etibarən oyun qaydalarına dəyişiklik etməyi planlaşdırır.

Sport1.az xəbər verir ki, bu barədə “RMC Sport” məlumat yayıb. “Arsen Venger ofsaydı” kimi qaydanın tətbiqi gündəmdədir. Yeni yanaşmaya əsasən, hücum edən futbolçu yalnız bütün bədəni ilə sonuncu müdafiəçini qabaqladığı halda ofsayd vəziyyətində sayılacaq.

Məsələ IFAB (Beynəlxalq Futbol Assosiasiyaları Şurası) tərəfindən yanvarın 20-də Londonda keçiriləcək illik iclasda müzakirə olunacaq. Fevral ayında isə dəyişiklik layihəsinin Baş Assambleyaya təqdim edilməsi nəzərdə tutulur. Sözügedən mexanizm daha əvvəl dekabrda keçirilən Ərəb Millətlər Kubokunda sınaqdan keçirilib.

Qeyd edək ki, 76 yaşlı Arsen Venger hazırda FIFA-da qlobal futbolun inkişafı üzrə direktor vəzifəsini icra edir və bu təşəbbüs məhz onun ideyası əsasında gündəmə gətirilib.