Millidə yeni dövr başlayır: Komanda əcnəbi mütəxəssisə tapşırılır
Yunan-Roma güləşi üzrə Azərbaycan millisinin yeni baş məşqçisinin kimliyi bəlli olub.
Sport1.az-a daxil olan məlumata görə, bu vəzifəyə iranlı mütəxəssis Məhəmməd Bana gətirilir. 67 yaşlı məşqçi dekabrın ortalarında Bakıya səfər edib və Azərbaycan Güləş Federasiyası ilə razılıq əldə olunub. Təyinatın yanvarda açıqlanacağı gözlənilir. Müqavilənin detalları ilə bağlı əlavə hansısa məlumat yoxdur.
Qeyd edək ki, Məhəmməd Bana güləş dünyasında kifayət qədər təcrübəli və tanınmış simalardandır. O, müxtəlif illərdə İranın Yunan-Roma güləşi üzrə milli komandasına baş məşqçilik edib (2005–2007, 2009–2012, 2014–2015 və 2018–2022). Bana rəhbərliyi dövründə qonşu ölkə yığması Dünya və Asiya Çempionatlarında, eləcə də Olimpiya Oyunlarında mühüm uğurlara imza atıb.
Təcrübəli mütəxəssis fərdi mükafatlarla da diqqət çəkib. O, 2012-ci ildə İran prezidenti tərəfindən “Cəsarət Ordeni” ilə təltif olunub. Eyni zamanda ISNA tərəfindən ilin ən yaxşı idman məşqçisi seçilib. 2011-ci ildə isə Dünya Güləş Birliyi tərəfindən “İlin ən yaxşı məşqçisi” adına layiq görülüb.
MİRZƏ S.
