Luis Enrike ilin ən yaxşı məşqçisi seçildi
PSJ-nin baş məşqçisi Luis Enrike 2025-ci ilin ən yaxşı çalışdırıcısı seçilib.
Sport1.az xəbər verir ki, ispaniyalı mütəxəssis “Globe Soccer Awards” versiyasına əsasən ilin ən yaxşı baş məşqçisi adına layiq görülüb. Səsvermədə Luis Enrike ilə yanaşı Xabi Alonso (“Real Madrid”), Mikel Arteta (“Arsenal”), Hansi Flik (“Barselona”) və Enso Mareska (“Çelsi”) də finalçılar sırasında yer alıb.
Qeyd edək ki, “Globe Soccer Awards” futbol dünyasında il ərzində ən böyük uğurlara imza atan şəxslərin müəyyənləşdirildiyi nüfuzlu mükafat mərasimidir. Qaliblər müxtəlif nominasiyalar üzrə aparılan səsvermə nəticəsində seçilir.
Xatırladaq ki, geridə qalan mövsümdə Luis Enrikenin rəhbərliyi altında PSJ yüksək nəticələr əldə edib. Paris təmsilçisi Çempionlar Liqasının qalibi olmaqla yanaşı, Fransa çempionatı, ölkə kuboku və Superkuboku da qazanıb. Bundan əlavə, komanda Klublararası Dünya Çempionatının finalına yüksəlib və UEFA Superkubokunu da muzeyinə aparıb.
