“Mançester Yunayted” “Yuventus”a 100 milyon avroluq təklif hazırlayır

“Mançester Yunayted” yarımmüdafiə xəttini gücləndirmək üçün iddialı addım atmağa hazırlaşır.

Sport1.az xəbər verir ki, TEAMtalk nəşrinin məlumatına görə, Premyer Liqa təmsilçisi “Yuventus”un gənc istedadı Kenan Yıldız üçün 100 milyon avro dəyərində təklif üzərində işləyir. İngilis klubu bu gedişlə həm rəqiblərini qabaqlamağı, həm də transfer yarışında üstün mövqe əldə etməyi hədəfləyir.

Qeyd olunur ki, 20 yaşlı futbolçuya “Arsenal” da maraq göstərir. Yıldızın Turin klubu ilə uzunmüddətli müqaviləyə imza atmaması isə İngiltərə təmsilçilərinin əlini gücləndirən əsas amillərdən biri sayılır. Tərəflər arasında bir neçə mərhələdə danışıqlar aparılsa da, hələlik razılıq əldə olunmayıb.

“Mançester Yunayted” rəhbərliyi düşünür ki, təklif edilən məbləğ “Yuventus”u əsas oyunçularından biri ilə yollarını ayırmağa razı sala bilər. Bununla yanaşı, futbolçuya təqdim ediləcək maliyyə paketinin də onun gözləntilərinə uyğun olacağı bildirilir.

Məlumata görə, transfer reallaşacağı halda Kenan Yıldız hücum xəttində Benyamin Şeşko, Brayen Mbemo və Brunu Fernandeşlə birgə çıxış edə bilər. Bu keçid baş tutarsa, türkiyəli yarımmüdafiəçi sol hücumameyilli yarımmüdafiəçi mövqeyində Mateus Kunyanın əsas rəqibinə çevriləcək.