Həbsdə olan ulduz karyerasını yenidən bərpa etmək istəyir

Niderland millisinin sabiq futbolçusu Kvinsi Promes karyerasını yenidən bərpa etmək niyyətində olduğunu açıqlayıb.

Sport1.az xəbər verir ki, hazırda həbsdə olan 33 yaşlı hücumçu işi üzrə apellyasiya prosesinin nəticəsini gözləyir. O, azadlığa buraxılacağı təqdirdə yenidən peşəkar futbola qayıtmaq üçün ciddi şəkildə hazırlaşacağını bildirib.

Promes müxtəlif ölkələrin klublarında çıxış edib. O, Niderlandda “Tvente” və “Qo Ahed İqls”, Rusiyada “Spartak”, İspaniyada “Sevilya”, daha sonra yenidən Niderlandda “Ayaks”, son olaraq isə BƏƏ təmsilçisi “Dubay Yunayted”in formasını geyinib. Futbolçu bir sıra mövsümlərdə məhsuldar oyunu ilə diqqət çəkib.

Kvinsi Promes açıqlamasında azadlığa çıxdıqdan sonra intensiv məşqlərə başlayacağını və yenidən klub tapacağına inandığını vurğulayıb. Onun sözlərinə görə, hazırkı mərhələdə əsas məqsədi ailəsinə maddi dəstək göstərməkdir.

Qeyd edək ki, Kvinsi Promes narkotik maddələrin qanunsuz dövriyyəsi və ağır xəsarət yetirmə ittihamları ilə 7,5 il müddətinə azadlıqdan məhrum edilib. Futbolçunun işi üzrə apellyasiya baxışı 2026-cı ilin sentyabr ayına planlaşdırılıb.