Məşhur futbolçu ürəyindəki problemə görə karyerasını bitirir
Braziliyanın “San-Paulu” klubunun yarımmüdafiəçisi Oskar karyerasını başa vurmaq qərarına gəlib.
Sport1.az xəbər verir ki, ESPN Brasil-in məlumatına görə, 34 yaşlı futbolçu səhhətində yaranan problemlərlə əlaqədar peşəkar futboldan ayrılacağını yaxın çevrəsinə bildirib. Mənbənin yazdığına əsasən, “San-Paulu” rəhbərliyi oyunçu ilə görüşərək onun gələcək planlarını öyrənmək niyyətindədir. Klub Oskara struktur daxilində vəzifə təklif etmə variantını da nəzərdən keçirir.
Bildirilir ki, “San-Paulu” yarımmüdafiəçi üçün hər hansı son tarix müəyyən etməyib və futbolçuya gələcəyi ilə bağlı qərar verməsi üçün istədiyi qədər vaxt tanıyıb.
Xatırladaq ki, noyabrın 11-də Oskar məşq mərkəzində planlı tibbi müayinədən keçərkən huşunu itirib. Daha sonra onda ürəklə bağlı problemlər aşkarlanıb.
Qeyd edək ki, Oskar 2012–2017-ci illərdə “Çelsi”nin formasını geyinib və London klubu ilə İngiltərə çempionu olub.
