"Üçüncü qol oyunun qırılma anı oldu" – Elvin Cəfərquliyev
Çempionlar Liqasının Liqa mərhələsinin 6-cı turunda “Qarabağ” Bakıda “Ayaks”a 2:4 hesabı ilə uduzdu.
Qarşılaşmadan sonra “köhlən atlar”ın futbolçusu Elvin Cəfərquliyev oyunla bağlı fikirlərini Sport1.az-a açıqladı:
“Bizim üçün vacib gün idi. Qazanacağımız üç xal növbəti mərhələ üçün şanslarımızı daha da artıracaqdı”.
O, matçın gedişindəki səhvlərin nəticəyə təsir etdiyini dedi:
“Oyuna yaxşı başladıq, üstünlük bizdə idi. Amma hücuma çıxanda bəzi səhvlər etdik. Bu tip oyunlarda ani səhvlər qapıda qol ilə yekunlaşır və biz də bunun acısını yaşadıq. Nəticədə qapımızda toplar gördük. Buraxdığımız iki qoldan sonra motivasiyamız düşdü. Üçüncü qol isə oyunun qırılma anı oldu. Qələbə qazanmağı çox istəyirdik, təəssüf ki, bacarmadıq. Qaçırdığımız qol şansları da bizi məğlubiyyətə gətirib çıxardı”.
Cəfərquliyev əvəzetmələrlə bağlı sualı da cavablandırdı:
“Əvəzetmələrə qarışmağım düzgün olmaz, bu, baş məşqçinin işidir. Qol imkanlarımız oldu, yararlana bilmədik. İtiriləcək bir şeyimiz yoxdur, əlimizdən gələni edəcəyik ki, növbəti iki oyundan maksimum yararlanaq və növbəti mərhələyə keçək”.
