Psixoloji mübarizədən "Qarabağ" qalib ayrıla biləcək? – MÜTƏXƏSSİS RƏYİ

UEFA Çempionlar Liqasının əsas mərhələsinin VI turunda "Qarabağ" doğma meydanda "Ayaks"ı qəbul edəcək.

"Köhlən atlar" bu matçda qələbə qazanacağı halda, növbəti mərhələ şanslarını ciddi səviyyədə artıracaq.

Görəsən, təmsilçimiz niderlandlılar qarşısında uğurlu nəticə ala biləcək?

Sualımızı Arif Əsədova yönəltdik. Tanınmış futbol mütəxəssis məsələ ilə bağlı düşüncələrini Sport1.az saytına açıqladı:

"Bu gün "Qarabağ"ı psixoloji baxımdan çox çətin oyun gözləyir. Çünki, bu gün qazanılacaq qələbə pley-off şanslarını yüksəldir. Rəqibin autsayder olmasına baxmayaraq, "Ayaks" elə "Ayaks"dır. Hal-hazırda eniş yaşasalar da, komandada yeni baş məşqço təyinatı var. Yeni çalışdırıcı ilə Erediviziyada 2 matçda qələbə qazanıblar. Bu baxımdan təmsilçimizi çətin sınaq gözləyir. Üstəlik "Qarabağ" qalib gəlməlidir, niderlandlıların isə itirəcəyi heç nə yoxdur. Ona görə də, onlar rahat oynaya bilərlər. Amma şanslardan danışsaq, təbii ki favorit "Qarabağ"dır. Evdə, doğma azarkeşlər önündə oynayacaqlar. Bu, "Qarabağ" üçün növbəti mərhələyə yüksəlmək uğrunda böyük şansdır. Oyunda ağdamlıların erkən qol vurmağı lazımdır ki, matçın gedişində rahat çıxış edə bilsinlər. Əks halda, vaxt keçdikcə rəqib meydançanı, azarkeşləri hiss etsə, bizim üçün problem yaranacaq".

MİKAYIL HACIYEV