İnkişaf Strategiyasının yeni məsul şəxsi kimdir? - Şirkət sahibi, Polad Həşimovun əsgəri, yoxsa kabel oğrusu?

AFFA dünən futbol ictimaiyyətini həyacanlandırdı.

Federasiya rəsmiləri - baş katib Cahangir Fərəcullayev, onun müavini Kamran Vəliyev, Futbolun İnkişaf Fondunun icraçı direktoru Tural Piriyev və İnkişaf Strategiyasının icrası üzrə layihə qrupunun dövlət qurumları ilə əlaqələrinə məsul şəxs Ramazan Səmədov cənub bölgəsinə səfəri çərçivəsində futbol infrastrukturunun vəziyyəti ilə yerində tanış olublar.

Yuxarıda qeyd olunanlardan ilk üçünü tanıyırıq. Bəs Ramazan Səmədov kimdir? Nə zaman İnkişaf Strategiyasının icrası üzrə layihə qrupunun dövlət qurumları ilə əlaqələrinə məsul şəxs vəzifəsinə təyin olundu? 

Görünür ki, axtardığımız şəxs olduqca vacib işi icra edir. Amma AFFA-nın rəsmi saytında nə onun təyinatı, nə də özü haqda məlumat var. 

İşimiz araşdırmaq, öyrənmək və ictimaiyyəti məlumatlandırmaqdır. Bu səbəbdən də internetdə Ramazan Səmədov haqda nəsə axtarmağa çalışdıq.

AFFA-nın məsul şəxsinin "Linkedin" səhifəsini tapdıq. R.Səmədovun özü haqda yazdıqlarını diqqətinizə çatdırırıq:

"Layihələr hazırlamaq və müxtəlif qurumlarla işləmək sahəsində 10 ildən çox təcrübəsi olan bir mütəxəssisdir. Brüssel və Rotterdam da daxil olmaqla Avropada 10 il işləyib. Dünyadakı bilik və təcrübəni yerli ehtiyaclarla uyğunlaşdırmağa çalışır. İnfrastruktur, su, səhiyyə, təhsil və gənclərlə bağlı layihələrdə yaxından iştirak edib.

Niderlandda fəaliyyət göstərən "Belcapo BV" adlı qida texnologiyaları şirkətinin ortaq sahibidir.

Rotterdam Menecment Məktəbində MBA təhsili alıb".

Gördüyünüz kimi, Ramazanov əla CV-yə malikdir. Amma onun futbolla yaxından-uzaqdan heç bir əlaqəsi yoxdur. 

Axtarışımızı davam etdiririk. 2020-ci ildə "Bizimyol.info" saytında Rotterdamda yaşayan Razaman Səmədovun şəhid olmuş general-mayor Polad Həşimov haqda paylaşımı dərc olunub. 

Bu məqam məni sevindirdi. Düşünürəm ki, Polad Həşimovla görüşmüş, onunla bağlı xatirəsi olan şəxs mütləq ki, vətənpərvərdir.

Axtarışa davam edirik. 2018-ci ildə "BBC"nin Azərbaycan bölməsində Ramazan Səmədovla bağlı yazı dərc olunub:

"Ramazan Səmədov bir neçə ildir Niderlandda yaşayır. O, əvvəlcə orada təhsil aldıqdan sonra hazırda Avropa İttifaqı institutları ilə bağlı konsultantlıq edir.

Ramazan Azərbaycan üçün darıxdığını, lakin Niderlanddakı işini də sevdiyini bildirir. O, gələcəkdə maraqlı iş təklifləri olarsa Azərbaycana qayıda biləcəyini deyir".

Hə, ölkəsi üçün darıxan biri mütləq vətəninə, millətinə bağlıdır. Görəsən, AFFA-dan iş təklifini Niderlandda qayıtdıqdan sonra alıb, yoxsa federasiya onu ölkəyə qayıtmağa razı salıb? Bu, başqa mövzudur...

Bura kiçi hər şey qaydasındadır. Ramazan bəylə bağlı məlumatlar müsbətdir. Amma 2011-ci ildə Daxili İşlər Nazirliyinin mətbuat xidməti bu informasiyanı ictimaiyyətlə bölüşüb:

"Kabel oğurlamağa cəhd göstərmiş Bakı şəhər sakini Ramazan Səmədov tutulmuşdur".

Ümid edirik ki, bu informasiyadakı şəxs başqasıdır. AFFA-nım məsul şəxsinin hansısa cinayət işi ilə əlaqəsi olmayıb. Arzulayaq ki, Ramazan Səmədov İnkişaf Strategiyasına ayrılan milyonları oğurlamayacaq.

AFFA isə diqqətli olmalıdır. İnformasiya çirkliliyinin yaşandığı bu dövrdə məsul şəxslər haqda dolğun, dəqiq məlumat paylaşmalıdır. Yəni, bilməliyik ki, İnkişaf Strategiyasının icrası üzrə layihə qrupunun dövlət qurumları ilə əlaqələrinə məsul şəxs vəzifəsini icra edən Ramazan Səmədov kabel oğrusu deyil, savadlı vətəndaş, şirkət sahibi, Polad Həşimovun əsgəri olan biridir...

İLKİN SULTANLI