Taktiki xaos, psixoloji hazırlıqsızlıq, liderin yoxluğu - "NEFTÇİ TARİXİNDƏ İLK"

Bizon Azərbaycan Kubokunun 1/8 final mərhələsinin "Zirə" - "Neftçi" qarşılaşması ən çox gözlənilən matçlarından biri idi. Gərgin və emosional mübarizə şəraitində keçən oyunun əsas vaxtı qolsuz bərabərliklə tamamlandı. Lakin əlavə vaxtın son dəqiqələrində "Zirə"nin vurduğu qol matçın taleyini həll etdi – 1:0.

Bu nəticə ilə "qartallar" 1/4 finala yüksəldi. "Neftçi" isə Azərbaycan Kuboku tarixində ilk dəfə 1/8 finalda mübarizəni dayandıraraq turnirlə erkən vidalaşdı. Taktiki xaos, psixoloji hazırlıqsızlıq, liderin yoxluğu dərinləşməkdə olan böhranı daha da kəskinləşdirdi.

Mövsümə böyük ümidlərlə başlayan flaqman heyətini yeniləmiş, təcrübəli və legioner futbolçularla güclənmişdi. Lakin bu transferlərin meydandakı oyuna və nəticələrə təsiri minimum səviyyədə qaldı. Klub nə kubokda irəliləyə, nə də Premyer Liqada stabil performans göstərə bildi. Turnir cədvəlinin ortalarında qərarlaşan komandanın avrokuboklara vəsiqə şansı da hər keçən gün daha da azalır.

“Neftçi” təkcə Azərbaycanın ən titullu komandası deyil, həm də azarkeş üçün bir ümid, bir futbol məktəbidir. Lakin son illərdə, xüsusən də 2024/25 - 2025/26 mövsümlərində yaşanan hadisələr bu brendin adına yaraşmayan, azarkeşin gözləntilərinə cavab verməyən səhnələr ortaya qoyur.

Bir klub Azərbaycan Kubokunda 1/8 final mərhələsini keçə bilmirsə, bu, sadəcə idman uğursuzluğu deyil bu, sistematik çöküşün göstəricisidir. Tarixdə ilk dəfə! Bu statistikaya bircə kəlmə ilə ad vermək olar: biabırçılıq.

Komanda mövsümə böyük transferlərlə, şah-şahalı paylaşımlarla başlamışdı. Amma nəticə? Heç nə. Taktiki xaos, psixoloji hazırlıqsızlıq, liderin yoxluğu və meydanda sərgilənən ruhsuz futbol. Azarkeş stadionda təkcə nəticə yox, ruh görmək istəyir. “Neftçi” isə hazırda nə nəticə verir, nə də ruh.

Bəziləri bu vəziyyəti baş məşqçinin üzərinə atır, bəziləri futbolçuları günahlandırır. Əslində isə problem daha dərindir. "Neftçi"də forma geyinmək bir fəxr idi. İndi isə sadəcə maaş müqaviləsi.

Tribunadakı minlərlə azarkeşin istəyi sona qədər mübarizə aparan “Neftçi"dir. Amma meydandakılar başını aşağı salıb, “nə olacaqsa, olsun” deyən bir qrup oyunçudur...

MƏHƏMMƏD HÜSEYNOV