“Qarabağ”la fərq böyükdür” – Füzuli Məmmədov

“Qarabağ” Misli Premyer Liqasının 13-cü turunda keçirilən oyunda “Karvan–Yevlax”ı 2:0 hesabı ilə məğlub edib.

Sport1.az xəbər verir ki, Yevlax təmsilçisinin baş məşqçisi Füzuli Məmmədov görüşdən sonra təşkil olunan mətbuat konfransında jurnalistlərin suallarını cavablandırıb.

"Futbolçularımız ilk hissədə dediyim plana uyğun yaxşı oyun sərgilədilər. İkinci yarıda bir az yorğunluq hiss olundu. "Qarabağ"ın əvəzetmələrindən sonra daha çox güc sərf etdik. Amma buna rəğmən komandam yaxşı oyun göstərdi. Məğlub olmamağa çalışırdıq. Amma bu da futbolun bir hissəsidir. "Qarabağ"ı təbrik edirəm. Oyunu təhlil edəcəyik. Qarşıda matçlar var. Həmin görüşlərə çox ciddi hazırlaşacağıq".

- Rəsmi olaraq baş məşqçi kimi təyinatınız açıqlanmayıb. Bu, qeyri-peşəkarlıq deyil?

- Yaxın zamanda bunlar hamısı öz həllini tapacaq.

- Ötən mövsüm I Liqada 10-cu yerdə gedən "Mingəçevir"i 4-cü pilləyə qaldırdız. "Karvan-Yevlax"da bu perspektivi görürsüz?

- Komandanın heyətində çox yaxşı futbolçular var. Sadəcə onlarda istədiyimiz performans yoxdur. Futbolçuların fiziki durumunu yüksəltməyə çalışacağıq. Bunun üçün zaman lazımdır. Hər oyun bizim üçün önəmlidir. Oyundan-oyuna komandamız daha da yaxşı olacaq.

- 5 il əvvəl Premyer Liqada çalışmısız. Bu müddətdə çempionatda nə dəyişib?

- "Qarabağ" həmişə yaxşı komanda olub. Onlara uğurlar arzulayıram. O vaxtkı "Qarabağ"la indiki arasında fərq böyükdür. Çempionata gəldikdə, sürət artıb, heyətlər daha güclüdür.