Muslera üzr istədi

Uruqvay millisinin qapıçısı Fernando Muslera DÇ-2026-dakı uğursuz çıxışına görə azarkeşlərdən üzr istəyib.

Sport1.az xəbər verir ki, onun açıqlamasını "TyC Sports" yayıb.

Təcrübəli qolkiper qrup mərhələsində buraxdığı kobud səhvlərin komandasının pley-offa yüksəlmək şansına mənfi təsir göstərdiyini etiraf edib. O bildirib ki, İspaniyaya 0:1 hesabı ilə uduzduqları son oyunda etdiyi səhvdən sonra baş məşqçi Marselo Byelsadan onu ikinci hissədə meydana buraxmamağı xahiş edib.

“Mən heç vaxt çətinliklərdən qaçmamışam, həmişə problemlərin üzünə dik baxmışam. Mənim üçün bütün Uruqvay xalqı ilə danışmağın ən səmimi yolu da budur. Bu qədər zəhmət və hazırlıqdan sonra idmanın mənə bu qədər məyusluq yaşadacağını heç təsəvvür etməzdim. Komanda yoldaşlarıma da paltardəyişmə otağında bunu dedim.

Bütün hazırlığıma baxmayaraq, dünya çempionatında layiqincə çıxış edə bilmədiyim üçün təəssüflənirəm. Komanda yoldaşlarımdan və bütün Uruqvay xalqından üzr istəyirəm. Ancaq başa düşürəm ki, bu sözlər kifayət deyil.

İndi mənə ən yaxın insanlarla birlikdə olmalı, gücümü bərpa etməli və yoluma davam etməliyəm. Çünki bu idman belədir: bəzən sənə çox şey verir, bəzən isə hər şeyi əlindən alır. Qarşılaşdıqlarımı qəbul etməli və məni gözləyən hər şeyə hazır olmalıyam”.

Qeyd edək ki, Uruqvay millisi H qrupunu 2 xalla 3-cü pillədə başa vuraraq dünya çempionatı ilə vidalaşıb. Komanda turnirdə Səudiyyə Ərəbistanı (1:1) və Kabo-Verde (2:2) ilə heç-heçə edib, İspaniyaya isə 0:1 hesabı ilə məğlub olub.