Ayxan Hüseynov milliyə niyə dəvət almadığını belə AÇIQLADI

Misli Premyer Liqasının XII turunda "Turan Tovuz" səfərdə "Araz-Naxçıvan" ilə heç-heçəyə razılaşıb - 1:1.

Matçdan sonra qonaqların hücumçusu Ayxan Hüseynov Sport1.az-a müsahibə verdi...

- Görüş haqda düşüncələrin nələrdir?

- ⁠Maraqlı oyun keçdi. Bilirdik ki, "Araz-Naxçıvan"a qarşı matçlarımız hər zaman çətin olub. Onlar hesabı açan zaman bildik ki, bizim üçün qol vurmaq çətinləşəcək. Amma ikinci hissədə meydana daxil olan oyunçuların sayəsində tarazlığı bərpa edə bildik. Son dəqiqələrdə üstünlüyü ələ alsaq da, ikinci topu rəqibin qapısından keçirə bilmədik.

- ⁠"Turan Tovuz" yeganə komandadır ki, mövsüm ərzində çempion olmağı hədəflədiyini açıq-aydın bildirib. Bunu motivasiya olaraq görürsünüz, yoxsa basqı?

- ⁠Hər idmançı zirvəni hədəfləyir, bu normaldır. Hamı bilir ki, ən böyük favorit "Qarabağ"dır. Avropada göstərdiyi oyundan söz açmağa belə ehtiyac yoxdur. Ən böyük nəticələrə çatmaq üçün əlimizdən gələni edirik. Alınar, sevinərik. Olmasa, bir daha cəhd edəcəyik. Uzun çempionat və böyük qarşılaşmalar qalıb.

- Səni milli komandada görə bilmirik. Səbəbini özündə görürsən, yoxsa başqa amillər var?

- ⁠Ayxan müəllim demişdi ki, legioner limiti ləğv olunduğu üçün az oynayırıq. Rəqabət böyüyüb. Ayxan müəllim məni Azərbaycana gətizdirib. Ona böyük hörmətim var. Üzərimdə çalışıram.

- ⁠Mövsüm ərzində öz komandasına əsas heyətdə forma tapa bilməyən oyunçular Fransaya, İslandiyaya qarşı meydanda olur. Bu fakt səni demotivasiya edir?

- ⁠Əksinə, məni daha da ruhlandırır. Heç vaxt "məni niyə çağırmadılar?" deyə şikayət etməmişəm. Daha da motivasiyalanıram ki, öz üzərimdə işləyərək formanı geyinmək şansı qazanım.