“Hər kəs güzgüyə baxmalıdır” – Van Deyk komandanı tənqid etdi
“Liverpul”un kapitanı Vircil van Deyk Premyer Liqanın 12-ci turunda evdə “Nottingem Forest”ə 0:3 hesabı ilə uduzulan görüşdən sonra komandanın durumunu dəyərləndirib.
Sport1.az xəbər verir ki, niderlandlı müdafiəçi Sky Sports-a açıqlamasında yaranmış vəziyyətdən ciddi narahat olduğunu bildirib:
“Çox asan qollar buraxırıq. İlk 30 dəqiqədə yaxşı oynadıq, imkanlar yaratdıq, amma yenə standart vəziyyətdən qol gördük. Həmin epizodda Alissona mane olub-olmadığını müzakirə etmək olar, amma qərar dəyişmədi. Ümumilikdə kifayət qədər yaxşı deyildik. Epizodlarda, ikili mübarizələrdə tələsirdik. Hazırda vəziyyət ağırdır”.
Komandanın psixoloji durumundan danışan Van Deyk fikirlərini belə davam etdirib:
“Qol buraxandan sonra gərginlik artır. Hamı tez bərabərlik tapmağa çalışdığı üçün tələskənlik yaranır. Çətin dönəmdəyik və buradan çıxış yolu tapmalıyıq. Açığı, bu mövzunu media qarşısında deyil, paltardəyişmə otağında müzakirə etməyi üstün tutardım. Bu, bizim üçün çox ağır gün oldu”.
Təcrübəli futbolçu kollektivdəki atmosferlə bağlı narahatlığını da gizlətməyib:
“Bu vəziyyəti qəbul edib daha çox çalışmalıyıq. Mövsüm ərzində bir neçə dəfə demişəm — hələ ki, alınmır, amma davam etməliyik. Komandadakı ab-hava yaxşı deyil. Hər kəs güzgüyə baxmalıdır”.
Qeyd edək ki, “Liverpul” hazırda Premyer Liqada 11-ci pillədə qərarlaşıb.
