“Daha çox qol vurmağa layiq idik” – Rəşad Eyyubov
21 yaşadək futbolçulardan ibarət Azərbaycan millisinin baş məşqçisi Rəşad Eyyubov Cəbəllütariq üzərində 1:0 hesablı qələbədən sonra AFFA-nın mətbuat xidmətinə açıqlama verib.
Sport1.az xəbər verir ki, mütəxəssis komandanın çıxışından razı qaldığını bildirib:
“Bu matç mənim üçün xüsusilə maraqlı idi. Rəqib fasiləsiz şəkildə 10 nəfərlə müdafiə olunurdu və əsas sual bu bloku necə yaracağımız idi. Birinci hissədə yaxşı şanslar yaratdıq, amma sona çatdıra bilmədik. Fasilədən sonra sistemi dəyişdik, daha çox təzyiq etdik və nəhayət, istədiyimizi aldıq. Daha böyük hesab qazana bilərdik, amma əsas olan 3 xaldır. Buradakı çətinliklərlə Çexiya və Şotlandiya da üzləşmişdi”.
Baş məşqçi qələbə qolunun müəllifi Murad Məmmədov haqda da danışıb:
“Muradın bu oyunda ön planda olacağını bilirdim. Aşağı bloklara qarşı o, çox faydalı xüsusiyyətlərə malikdir. Ümid edirəm ki, bu qol ona əlavə inam verəcək”.
Eyyubov əsas yığmanın rəsmi matçlarından sonra U-21-ə qoşulan Rüfət Abbasovu da xüsusi qeyd edib:
“Rüfətə təşəkkür edirəm. Uzun səyahətdən sonra meydanda xarakter göstərdi və 90 dəqiqə mübarizə apardı. Ümumilikdə komanda daha dominant futbol sərgilə bildi”.
Mütəxəssis oyunu tribunadan izləyən A millinin baş məşqçisi Ayxan Abbasovun iştirakını da müsbət məqam kimi dəyərləndirib:
“Baş məşqçinin stadionda olması futbolçulara əlavə motivasiya verdi. İndi bu qələbəni analiz edib növbəti mərhələyə hazırlaşacağıq. Gələcəyə nikbin yanaşırıq”.
