Azərbaycan millisinin üzvü üzr istədi

Azərbaycan millisinin heyətində oynamış və hazırda “Sivasspor”un formasını geyinən Mert Çelik haqqında Türkiyə Futbol Federasiyasının apardığı mərc araşdırması çərçivəsində verilən 45 günlük uzaqlaşdırma qərarı gündəm olub.

Sport1.az bildirir ki, 25 yaşlı müdafiəçi məsələ ilə bağlı ilk dəfə olaraq şəxsi sosial media hesabında açıqlama yayıb və yaşananlarla bağlı mövqeyini bölüşüb:

“Bir müddətdir Türkiyə Futbol Federasiyasının gündəmində, adımın da hallandığı və nüfuzumuza zərər verən bir məsələ səbəbindən dərin narahatlıq yaşayıram.

Uşaqlıq illərində bir internet saytına qeydiyyatdan keçməyimin illər sonra qarşıma çıxan cəzasının ağrısını son günlərdə daha dərindən hiss edirəm. Ailəmə, yaxınlarıma və bütün Sivas xalqına yaşatdığım bu vəziyyət qarşısında duyduğum utancı sözlərlə ifadə etmək mümkün deyil. Yenə də, ən yüngül cəza ilə bu prosesi geridə qoyduğum üçün bir qədər təsəlli tapıram.

Bu müddət ərzində gecə-gündüz demədən çalışmalarımı davam etdirəcəyimdən heç kimin şübhəsi olmasın.

Meydana qayıtdığımda Sivas xalqı və böyük “Sivasspor” üçün tərimin son damlasına qədər mübarizə aparmağa davam edəcəyəm. Gündəmi məşğul etdiyim üçün bütün "Sivasspor" ailəsindən səmimi şəkildə üzr istəyirəm”.