Meksikada gənc boksçunun meyiti tapıldı

Meksikada 21 yaşlı peşəkar boksçu Xesus İvan Merkado Kabreranın meyiti yol kənarındakı arxda tapılıb.

Sport1.az xəbər verir ki, idmançının ailəsi onun üç gün əvvəl itkin düşdüyünü bildirib. Cəsəd Merkadonun bədənindəki döymələr vasitəsilə tanınıb. Rəsmi məlumatlara görə, cəsəddə zorakılıq izlərinə rast gəlinməsə də, kənar müdaxilə ehtimalı araşdırılır. Hadisə ilə bağlı Sonora ştatının Baş Prokurorluğu istintaqa başlayıb.

Xatırladaq ki, Xesus Merkado peşəkar rinqdə debütünü 2021-ci ilin sentyabrında edib. O, indiyədək 17 döyüş keçirib – 7 qələbə, 9 məğlubiyyət və 1 heç-heçə ilə yadda qalıb. Sonuncu döyüşünü bu ilin aprelində Enrike Torres Xuaresə qarşı keçirən Merkadonun növbəti görüşü sentyabrın 27-də, Sonoranın Ermosilyo şəhərində Adrian Ruizə qarşı planlaşdırılırdı.