“Mingəçevir Reqatası-2026” beynəlxalq yarışına Füzulidə start verilib

Avarçəkmə və kanoe üzrə “Mingəçevir Reqatası-2026” beynəlxalq yarışına Füzulidə – Köndələn su anbarında start verilib.

Sport1.az xəbər verir ki, açılış mərasimində əvvəlcə Azərbaycan Respublikasının Dövlət Himni səsləndirilib, Azərbaycanın ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edilib.

Gənclər və idman naziri Fərid Qayıbov açılış nitqində 2022-ci ildən etibarən Suqovuşan, Köndələn və Sərsəngdə keçirilən avarçəkmə yarışlarının əhəmiyyətindən danışıb, idmana və idmançılara göstərilən dövlət qayğısını vurğulayıb. Nazir iştirakçıları növbəti idman bayramı münasibətilə təbrik edərək onlara uğurlar arzulayıb.

Yarışlar öncəsi Köndələn su anbarında əjdaha qayıqları və kayaklarda idmançıların nümunəvi çıxışları nümayiş etdirilib. Daha sonra müxtəlif yaş qrupları üzrə yarışlara start verilib.

Milli komandamız ilk yarış günündə 4 medal qazanıb.

2008–2009-cu il təvəllüdlü idmançılar arasında 1 nəfərlik kayak qayığında 200 metr məsafəyə yürüşdə Əlimurad Hacızadə finiş xəttini birinci, Nuran Rəhimli isə ikinci keçib. Bununla da Azərbaycan komandasının aktivinə ilk qızıl və gümüş medallar yazılıb.

2010–2011-ci il təvəllüdlü idmançılar arasında 1 nəfərlik kayak qayığında 200 metr məsafəyə yürüşdə Elmir Tarverdiyev üçüncü yeri tutub. Daha bir idmançımız Hüseyn Səmədli isə 2008–2009-cu il təvəllüdlülər arasında 1 nəfərlik kanoe qayığında 200 metr məsafəyə yürüşdə bürünc medal qazanıb.

Tədbir Füzuliyə köçən sakinlər və ətraf rayonlardan gələn idman həvəskarları tərəfindən böyük maraqla qarşılanıb.

Qeyd edək ki, “Mingəçevir Reqatası-2026” beynəlxalq yarışı sentyabrın 30-da və oktyabrın 1-də Mingəçevir şəhərindəki “Kür” Olimpiya Tədris-İdman Mərkəzində davam edəcək.