Qurban Qurbanovun “hilal taktikası”, “Qarabağ”ın Lissabon fəthi - YAZI

Matçın başladığı andan rəqib hesabı açana qədər olan müddətdə komandamız meydanda rahat görünürdü.

Ağdamlılar Portuqaliya nəhənginə diş göstərməyə çalışırdı. Görüşün 6-cı dəqiqəsində canımıza qorxu düşdü. “Benfika” künc zərbəsindən hesabı açdı. Erkən qol vurulmuşdu. Bir anlıq “Çelsi” faciəsini xatırladıq.

“Qarabağ” birinci qoldan sonra toparlanmağa çalışırdı. Lakin komandanın üzvləri müdafiədə yersiz səhvlər edirdilər. Bunun nəticəsində 16-cı dəqiqədə hesab 2:0 oldu.

Çox boşluqlar verirdik və rəqibin bizi böyük hesabla məğlub edəcəyini düşünürdük. Amma “Qarabağ” bizi yanıltdı. İlk hissənin sonlarına doğru komandamız özünə gəldi. Artıq qol imkanları da yaradırdıq. Nəhayət 30-cu dəqiqədə istəyimizə çatdıq. Zubirin qazandığı cərimə zərbəsindən sonra Leandro Andrade Camilo Durandan qayıdan topu var gücü ilə qapıya göndərdi.

Möhtəşəm anlar idi. 25 yaşlı futbolçu matçdan öncə mediaya açıqlamasında qol vuracağını hiss etdiyini demişdi. Leo sözünün üstündə durdu.

Bu qol komandamızı daha da ruhlandırdı. Hissənin sonlarına doğru təmsilçimiz qol imkanları yaratsa da, bəxti gətirmədi. Kadinin zərbəsi dirəyə dəydi, qayıdan topu da Yankoviç qola çevirə bilmədi.

İlk hissə meydan sahiblərinin üstünlüyü ilə başa çatdı. Qurban Qurbanov öz futbolçularını oyuna yaxşı hazırlamışdı. Meydanda təcrübəli, mərd görünürdülər. Qorxaq futbol oynamırdılar.

İkinci hissəyə ağdamlılar fəal başladılar. Lissabonda şok hadisələr baş verirdi. “Köhlən atlar” “Benfika” üzərində hökmranlıq edirdi. 49-cu dəqiqədə Marko Yankoviçin möhtəşəm ara ötürməsini Camilo Duran qola çevirdi. İnanmaq çətin idi. “Qarabağ” geridönüş etmişdi.

Bu qol “Benfika”nı daha da qəzəbləndirdi. Hücumların kəsərini artırdılar. Lakin “Qarabağ”ın müdafiəçiləri meydanın hər qarşı uğrunda mübarizə aparırdılar. Onlar öz mövqelərində qüsursuz idilər. Bəhlul ilk hissədə etdiyi səhvlərdən nəticə çıxarmış kimi görünürdü. “Benfika” təzyiqi artırsa da, qol vura bilmirdi. Mateuş Silva həm müdafiəyə, həm də hücuma yaxşı dəstək verirdi. Elvin hücumlarda iştirak etsə də, mövqeyində boşluqlar buraxırdı. Hücumlardan birində Kadinin cərimə meydanına doğru asmasını Bəhlul başla tora göndərsə də, oyundan kənar vəziyyət olduğu üçün qol qeydə alınmadı.

Komandamız tiki-taka nümayiş etdirərək rəqibi yormağa çalışırdı. Portuqaliyalılar aqressivləşirdi. “Benfika”nın müdafiəçisi Nikolas Otamendi Yankoviçə sərt müdaxilə edərək onu zədələyir. Bu epizodda hakim argentinalıya vərəqə göstərmədi. Heç qayda pozuntusunu belə qeydə almadı. Komandanın ən yaxşı isə zədələnmişdi.

Vəziyyət çıxılmaz idi. Qurban Qurbanov Yankonu Kaşuk, Elvini Toralla əvəzlədi. Daha öncə meydana daxil olan Addai sol cinahda şou göstərirdi. Əvəzləmələr işə yaramışdı. “Qarabağ” istəyinə 86-cı dəqiqədə çatdı. Kaşuk lissabonluları məyus etmişdi.

Qoldan sonra “Benfika” azarkeşləri ağ bayraq qaldırdılar. Portuqaliya təmsilçisi məğlub olurdu. Bunu Azərbaycan klubu bacarırdı. Heç kimin inanmadığı, darmadağın olacağı düşünülən komanda tarix yazdı.

Oyunda “futbol müharibəsi”ni izlədik. İlk dəqiqələrdən geri çəkilən “Qarabağ” 2 qol buraxaraq məğlub duruma düşdü. Lakin bu, taktiki gediş idi. Bu, “hilal taktikası” idi. Qurban Qurbanov komandası Lissabonda “at oynadaraq” möhtəşəm qələbə qazandı. “Qarabağ” Azərbaycan futbolu tarixinə növbəti dəfə adını qızıl hərflərlə yazdırdı.

MİKAYIL HACIYEV