Legioner limitinin ləğvinin süni rəqabəti təbiiyə çevirməsi üçün lazım olan 3 şərt - TƏHLİL

2025/26-cı illər mövsümündən etibarən Azərbaycan Premyer Liqasında legionerlər üçün tətbiq olunan limitin ləğvi Azərbaycan futbolunda əhəmiyyətli dönüş nöqtəsi olacaq.

Bunun futbolumuzu proqresə və ya reqresə aparacağını isə yalnız zamanla görə biləcəyik.

Ümumiyyətlə, bu cür əhəmiyyətli, futbolun təməllərinə təsir edən qərarları qəbul edərkən arxasında dayanan elmi, statistik, analitik araşdırmaların olması və ictimaiyyətlə bölüşülməsi vacibdir. Ölkə futboluna necə təsir edəcəyini hesablamaq lazımdır. Qərarı dərhal verib, tətbiq etmək doğru yanaşma deyil. Belə məsələlər məsuliyyətli işlərdir. İki-üç il sonrakı mövsümlərdən etibarən tətbiq edilməyə başlanması lazımdır ki, klublarımız buna uyğun qısa və uzunumüddətli inkişaf strategiyalarını formalaşdıra bilsinlər.

Ən böyük suallardan biri isə qərarın yerli oyunçu bazarına necə təsir edəcəyidir. Legioner limitinin ləğv olunması, həm klub idarəçiliyi, həm də yerli futbolçuların karyerası üçün yeni imkanlar yaratsa da, bəzi problemləri də gündəmə gətirə bilər. Bu qərarın həm müsbət, həm də mənfi təsirləri ola bilər. Yaxşı şeylərdən başlayaq.

Müsbət tərəfi ondan ibarətdir ki, xarici oyunçuların sayının artması azərbaycanlı futbolçulara daha yüksək səviyyədə rəqabət aparmaq imkanı verəcək. Bu, uzun illərdir “komfort zonası”nda olan yerlilərin bacarıqlarını daha da inkişaf etdirmələrinə şərait yaradacaq. Digər tərəfdən isə klublar “onsuz da Azərbaycanda futbolçu yoxdur” şüarını əlində bayraq tutub əcnəbiləri heyətə cəlb etməyə davam edəcək. Onları əsas heyətdə meydana buraxmağa şərait yaradacaq. Yerli oyunçular bir növ “ehtiyat oyunçular skamyasının daimi sakinləri”nə çevrilmək qorxusu ilə üz-üzə qalacaqlar. Belə də uduzan yenə də millimiz olacaq.

Bu vəziyyət xüsusilə gənc və perspektivli futbolçular üçün çətinlik yarada bilər. Xaricilərin daha çox oynaması cavanların oyun vaxtı və təcrübəsini azaldacaq. Bu da onların inkişafına mənfi təsir göstərə bilər.

Hazırda ölkə futbolunda qarşılaşdığımız hal süni rəqabəti təbiiyə çevirə bilər, o şərtlərlə ki:

1. Premyer Liqamıza gətiriləcək oyunçular həqiqətən də keyfiyyətli olsun (daha yüksək reytinqli liqalarda, ölkəsinin milli komandasında, beynəlxalq turnirlərdə oynamış oyunçular).

2. Klublar yerli oyunçuların keyfiyyətinə daha çox diqqət yetirərək onları beynəlxalq səviyyədə rəqabətə uyğun hazırlamaq üçün düzgün investisiya etsinlər: təlim proqramları, infrastrukturun inkişafı və s.

3. Skautinq: istər yerli, istərsə də beynəlxalq səviyyədə istedadlı oyunçuların aşkarlanması və klubların heyətinə cəlb edilməsi. Bunun effektiv yolu isə ən aşağı liqalardan başlayaraq bütün oyunların təhlil edilməsi və hər klubda ən azı 2-3 yerli analitikin olmasıdır.

Davamı var...

Emil Şükürbəyli