Zaur Həşimov: “Yeni transfer planlaşdırılmır”

Misli Premyer Liqasının II turunda səfərdə “Qəbələ”nin qonağı olan və 1:0 hesabı ilə qalib gələn “Şəfa”nın baş məşqçisi Zaur Həşimov oyun sonrası mətbuat konfransında jurnalistlərin suallarını cavablandırıb.

Sport1.az xəbər verir ki, mütəxəssis əvvəlcə qarşılaşma barədə təəssüratlarını bölüşdü:

– Şükürlər olsun ki, ilk 3 xalımızı qazandıq, həm də Qəbələ səfərində bu nəticəni əldə etdik. Burada oynamağın nə qədər çətin olduğunu hamımız bilirik. Həm rəqib keyfiyyətli komandadır, həm də Qəbələnin havası elədir ki, futbolçular bir müddət nəfəs almaqda əziyyət çəkirdilər, amma onlar bütün çətinliklərin öhdəsindən gəldilər. Zaman-zaman üstünlüyü rəqibə verirdik. Bu da normaldır, 90 dəqiqə təzyiqi saxlamaq mümkün deyil. Həm biz qol epizodları yaratdıq, həm də rəqibin imkanları oldu. Nəticədən və oyunçuların çıxışından çox razı qaldım. Bu qələbəni “Şəfa” rəhbərliyinə və Bakıdan bura gələn azarkeşlərimizə həsr edirik.

Həşimov daha sonra jurnalistlərin suallarını cavablandırdı:

– İlk oyunla müqayisədə heyətdə 4 dəyişiklik etmişdiniz və yerli futbolçuya şans vermişdiniz. Bu dəyişikliklər nə ilə əlaqədar idi?

– Biz cəmi ay yarımlıq komandayıq. Hələ də optimal heyətin və oyun stilinin axtarışındayıq. Dəyişikliklər sırf yerli və ya legioner məsələsi ilə bağlı deyildi. Axtarışları maksimum nəticə ilə başa vurmaq üçün bu addımı atdıq.

– Mövsümün əvvəlini nəzərə alsaq, komandanın potensialını necə dəyərləndirirsiniz? Məqsəd yalnız liqada qalmaqdır, yoxsa yuxarı pillələrdə qərarlaşmaq?

– Bu mövsüm qarşıya qoyulan əsas məqsəd Premyer Liqada yerimizi qorumaqdır. Gənc kollektivimiz var. Uzun fasilədən sonra geri dönmüşük, amma 26 il əvvəlki “Şəfa” ilə indikini müqayisə etmək düzgün olmaz. Daha da inkişaf etməliyik. İnanıram ki, bu heyətlə minimum hədəfimizə çata biləcəyik.

– Transfer pəncərəsinin bağlanmasına az qalmış yeni futbolçuların gəlişi gözlənilir?

– Xeyr, yeni transfer olmayacaq, bu məsələni bağlamışıq. Güclənmək dedikdə komandadaxili inkişafı nəzərdə tuturam. Məsələn, Luis Felipe ilk hissədə oynadı, amma cəmi üç həftədir bizimlədir. Elə oyunçular var ki, ikinci dəfədir 90 dəqiqə birgə çıxış edirdilər. Həm fiziki, həm də meydandakı anlaşma baxımından artırmağı nəzərdə tuturdum. Yeni transfer planlaşdırılmır.

– “Şəfa” fiziki cəhətdən rəqibdən daha dözümlü görünürdü. Bu, toplanışın bəhrəsidir, yoxsa heyətdəki futbolçuların fərdi keyfiyyətidir?

– Heyətdə bütün oyunu rahat oynaya bilənlər də var, hələ tam hazır olmayanlar da. Əvəzetmələri öncədən planlaşdıraraq meydandakı balansı qorumağa çalışdıq.