"Sumqayıt"ın məğlubiyyəti, bizim ziddiyyətimiz - KÖŞƏ

Bölmə adı Sumqayıt

Yayımlandı 17-08-2026, 21:11

157

Premyer Liqa başladı. “Sumqayıt” evdə “Neftçi”yə 1:3 hesabı ilə uduzdu. Sosial şəbəkələrdə isə aləm dəydi bir-birinə. Futbolçuları tənqid edən kim, baş məşqçini yetərsiz sayan kim, rəhbərliyi istefaya səsləyən kim... Nə olub axı?

“Sabah”, “Qarabağ”, “Neftçi” və “Turan Tovuz”un milyonlar xərcləyərək çempionluq uğrunda mübarizə apardığı liqada “Sumqayıt”dan nə istəyirik?

Klub əsas heyətdə 6-7 azərbaycanlıya şans verir. Premyer Liqada rahat qala bilir. Üstəlik, milli komandalar üçün oyunçu yetişdirir.

Hər kəs milyonlar xərcləyib çempionluğa oynamalıdır? Hamı hazır legionerlər gətirməlidir? Bəs onda azərbaycanlılar harada meydana çıxacaq?

“Neftçi” ilə qarşılaşmada start heyətində 6 yerli futbolçu yer alıb. Xəyal Fərzullayev, Vüsal Paşayev, Höccət Haqverdi, Nadir Orucov, Səbuhi Abdullazadə və Nihad Əhmədzadə ilk dəqiqələrdən meydanda olublar.

İllərdir azərbaycanlılara daha çox imkan yaradılmasından danışırıq. Klubların öz yetirmələrinə güvənməsinin vacibliyini vurğulayırıq. “Sumqayıt” da məhz bu istiqamətdə addım atır.

Amma ilk məğlubiyyətdən sonra mənzərə dəyişir. Futbolçu pisdir, məşqçi bacarıqsızdır, rəhbərlik istefaya getməlidir...

Bir az səbir etmək olmaz?

Üstəlik, “Sumqayıt” çempionluğa oynayan “Neftçi”yə məğlub olub. “Kimyaçılar” öz potensialına uyğun rəqiblər olan “Şamaxı”ya, “Şəfa”ya, “Qəbələ”yə və ya “İmişli”yə uduzsaydı, bu tənqidlərin müəyyən mənada əsasını başa düşmək olardı.

Gəlin, bir az da ədalətli olaq.

Səbuhi, Nadir, Vüsal, Xəyal, Nihad uduzduqları üçün “Sumqayıt”da oynamaq haqqını itirirlər? Məgər onların səhv etmək, uduzmaq, təcrübə toplamaq haqqı yoxdur?

“Sumqayıt”ın qarşısında iki yol var. Ya böyük pullar xərcləyib hazır legionerlər gətirəcək və 4-5-ci yer uğrunda mübarizə aparacaq. Ya da daha az büdcə ilə azərbaycanlılara güvənəcək, onları yetişdirəcək.

Klub ikinci yolu seçib.

Bu yolun isə bir şərti var. Səbir.

Yeni gələnlər uyğunlaşmalıdır. Gənclər təcrübə toplamalıdır. Baş məşqçi öz oyun modelini formalaşdırmalıdır. Bunların hamısı bir gündə baş vermir.

Əlbəttə, “Neftçi” ilə görüşdə çatışmazlıqlar kifayət qədər idi. Bunu danmaq olmaz. Üzərində işlənməli məqamlar da var. Amma söhbət mövsümün ilk turundan gedir. Qarşıda hələ uzun çempionat dayanır.

“Sumqayıt”ın seçdiyi model bəlkə də çempionluq gətirməyəcək. Amma sabah Azərbaycan futboluna yeni adlar qazandıra bilər. Milli komandalar üçün seçim imkanlarını artıra bilər. Bu da heç də kiçik iş deyil.

Bir tərəfdən milyonlar xərcləyən klublarla rəqabət istəyirik, digər tərəfdən isə öz futbolçularına güvənən komandaya səbir göstərmirik. Bəlkə əvvəlcə nə istədiyimizə qərar verək?

Müəllif: Həlimə Əliyeva