"Qarabağ"ın məğlubiyyətində yalnız özləri günahkardır" - Veteran oyunçu

"İlk oyundan sonra "Dinamo"nun necə qalib gəlməsindən daha çox "Qarabağ"ın qol vura bilməməsi barədə düşünürdüm. "Qarabağ"ın məğlubiyyətində yalnız özləri günahkardır".

Sport1.az xəbər verir ki, bu sözləri Kiyev təmsilçisinin və Ukrayna milli komandasının sabiq hücumçusu Artyom Milevski deyib.

O, UEFA Konfrans Liqasının III təsnifat mərhələsinin "Qarabağ" - "Dinamo" duelindən öncə matçı dəyərləndirib (ilk oyun 0:1).

Veteran futbolçu Bakıda baş tutacaq cavab qarşılaşmasının çətin keçəcəyini deyib:

"İkinci oyunun qalibi səhvlərini düzəltmək üçün daha çox çalışan tərəf olacaq. İnanmıram ki, "Dinamo" tez bir zamanda öyrənsin. Hətta öyrənsələr belə, bu, çox uzun vaxt aparacaq. Ümumilikdə komanda zəif oynayır".

Artyom ukraynalıların müdafiə xəttinin bərbad olduğunu diqqətə çatdırıb:

"Azərbaycanda çətin olacaq. "Qarabağ"ın oyuna uzun müddət diqtə etməyinin mənası yoxdur. Əgər "Dinamo" lap "dərində" müdafiə olunub əvvəldən topu uzaqlaşdırmalı olsa, nə baş verə biləcəyini təsəvvür etməkdən belə qorxuram.

Mənim ehtimalım belədir: "Qarabağ" qol vurur, "Dinamo" cavab verməyə çalışır, amma nəticə hasil olmur. Matç əlavə vaxta qədər və ya penaltilər seriyasına qədər uzana bilər. Hər iki tərəfin mərhələ adlamaq şansı var".

Xatırladaq ki, "Qarabağ" - "Dinamo" matçı sabah saat 20:00-da start götürəcək.