“Orhus”un baş məşqçisi: “Sabah” pley-offa layiq idi“

Çempionlar Liqasının III təsnifat mərhələsində keçirilən “Sabah” – “Orhus” oyunundan (4:0) sonra qonaq komandanın baş məşqçisi Yakub Poulsen jurnalistlərin suallarını cavablandırdı.

Sport1.az xəbər verir ki, mütəxəssis media nümayəndələri ilə görüşdə bunları dedi:

– İkinci hissədə nə baş verdi?
– Böyük səhvlər etdik. Rəqibə topa sahib olmağa imkan verdik. “Sabah” kimi komandaya belə şans versən, səni cəzalandırar.

– İlk qolu necə şərh edərdiniz?
– Topa nəzarət etmək istəyirdik, amma üstünlük rəqibə keçdi, təzyiqi artırdılar. Müdafiədə səhvlərə yol verdik. Böyükhesablı məğlubiyyətə səbəb bunlar oldu.

– Avropa Liqasında rəqib “Benfika” olacaq. Şansları necə dəyərləndirirsiniz?
– Çətin püşk oldu. Qarşıda çempionat matçımız var. Bundan sonra “Benfika” haqqında fikirləşəcəyik.

– Bir hissədə 4 qol buraxacağınıza inanırdınız? Belə ssenari gözləyirdiniz?
– Əlbəttə, belə şey gözləmirdik. Səhvlərimizə görə bu cür uduzduq. “Sabah” pley-offa layiq idi. İki oyuna da baxsaq, yaxşı performans sərgilədilər. “Sabah” növbəti mərhələyə layiq olduğunu sübut etdi.

– “Sabah”ın heyətində hansı futbolçunu komandanızda görmək istərdiniz?
– “Sabah”ın keyfiyyətli futbolçuları var. Xüsusilə, hücumda effektivdirlər. İvan Lepinitsanı da fərqləndirərdim.