AFFA UEFA ilə birgə oldu, FİFA-ya qarşı çıxdı

UEFA və quruma üzv olan 55 milli assosiasiya (AFFA-da daxil olmaqla) FİFA-nın Dünya Çempionatı və digər turnirlərdə payların özəl investorlara satılması planına qarşı birgə bəyanat yayıb.

Sport1.az xəbər verir ki, açıqlamada Dünya Çempionatının kommersiya məhsulu olmadığı və heç vaxt satışa çıxarıla bilməyəcəyi vurğulanıb.

UEFA FİFA-nın bu təşəbbüsü futbol ictimaiyyəti ilə məsləhətləşmədən irəli sürdüyünü bildirərək bunu rəhbərlik baxımından ciddi uğursuzluq adlandırıb.

Qurumun bəyanatında qeyd olunub ki, milli assosiasiyalar qarşısında seçim qoyulub: ya bu planı qəbul etməli, ya da nəticələrinə qatlaşmalıdırlar. UEFA bunu “demokratik qərar” deyil, təzyiq yolu ilə idarəçilik kimi qiymətləndirib.

Bəyanatda vurğulanıb ki, özəl investorlar FİFA turnirlərində pay sahibi olacağı təqdirdə futbolun gələcəyi idman maraqları ilə deyil, səhmdarların maliyyə gözləntiləri ilə müəyyənləşəcək.

UEFA bildirib ki, bu model dünya futbolunda qəbuledilməzdir və Avropa futbolu ona heç vaxt legitimlik verməyəcək.

Qurum həmçinin açıqlayıb ki, FİFA bu təklifdən tamamilə imtina etməyənə və gələcəkdə yarışların idarəçiliyinin özəl mülkiyyətə açılmayacağına dair hüquqi təminat verməyənə qədər UEFA-ya üzv ölkələrin milli komandaları FİFA-nın təşkil etdiyi heç bir yarışda iştirak etməyəcək.

Sonda vurğulanıb ki, Dünya Çempionatı futbola məxsusdur, satış obyekti deyil və Avropanın səsi olduğu müddətdə belə də qalacaq.