İsmayıllıda qaliblər mükafatlandırıldı – “Bakı–Xankəndi” davam edir

“Bakı–Xankəndi” Azərbaycan velosiped yarışının ikinci mərhələsindən sonra qaliblərin mükafatlandırılması mərasimi keçirilib.

Sport1.az xəbər verir ki, tədbirdə İsmayıllı Rayon İcra Hakimiyyətinin başçısı Nahid Bağırov, Azərbaycan Velosiped İdmanı Federasiyasının birinci vitse-prezidenti və yarışın Təşkilat Komitəsinin sədri Sahib Ələkbərov iştirak ediblər.

Mərhələnin yekununda Qazaxıstan təmsilçisi Yevgeni Fyodorov birinci olub. İsveçrəli Aleksandr Balmer ikinci, Uruqvaylı Erik Antonio Faqundes isə üçüncü yeri tutub.

Velosipedçilər ikinci etapda “Sea Breeze”dən start götürərək İsmayıllıya qədər 193,3 kilometrlik məsafəni qət ediblər. Marşrut mürəkkəb relyefi ilə seçilib. Belə ki, mərhələ çərçivəsində 3 dağ yoxuşu və 2 sprint təsnifatı yer alıb.

Xatırladaq ki, yarışın ilk mərhələsinin qalibi Çinin “Li-Ninq Star” komandasının belaruslu üzvü Aleksey Şnirko olmuşdu.

“Bakı–Xankəndi” veloyarışının keçirilməsində əsas məqsəd Azərbaycanda velosiped idmanının inkişafına dəstək vermək, ölkənin beynəlxalq yarışların təşkilindəki imkanlarını nümayiş etdirmək, eyni zamanda işğaldan azad edilmiş ərazilərə diqqəti artırmaqdır.

Beynəlxalq Velosipedçilər İttifaqının (UCI) 2.1 kateqoriyalı təqvimində yer alan yarışda 20 ölkədən 24 komanda iştirak edir. Beş mərhələdən ibarət turnirin ümumi mükafat fondu 50 min avrodan artıqdır. Yarış mayın 14-də başa çatacaq və son etap Xankəndidə təşkil olunacaq.