"Turan Tovuz" üçün indi əsas iş başlayır - YAZI

​"Turan Tovuz" cəmi 4 il əvvəl başladığı çətin yolda Avropa vəsiqəsini bu gün rəsmən təmin etdi. 

Bu tarixi uğur Ehtiram Quliyevin klubu himayəsinə götürüb qurduğu peşəkar təməlin məntiqi nəticəsidir. Kurban Berdiyevin gətirdiyi dəmir intizam və oyun fəlsəfəsi bu gedişatı zirvəyə çatdırdı.

​Amma vəsiqəni cibə qoymaqla iş bitmiş sayılmır. Əsl sınaq məhz indi başlayır. Hazırda bütün diqqətlər və məsuliyyət Tovuz şəhər stadionuna yönəlib. Oradakı təmir-tikinti işləri bir an belə dayanmamalıdır. Əsas hədəf arenanı UEFA-nın tələblərinə uyğunlaşdırıb lisenziya məsələsini vaxtında həll etməkdir.

​Tovuz azarkeşi bu tarixi anı Bakı stadionlarında deyil, məhz öz yurdunda izləməyə layiqdir. Avropalı rəqibləri Tovuzun möhtəşəm atmosferində qarşılamaq komandanın meydandakı ən böyük silahı olacaq.

​Qrupa düşmək möhtəşəm bir tarix olar. Lakin nəticədən asılı olmayaraq hər oyunda sonadək vuruşmaq şərtdir. Bu qədər zəhmət və tökülən tər məhz Tovuzda əsl futbol bayramı yaşamaq üçündür. 

Hər şey zamanla həll olunar. İndi bu böyük nailiyyət münasibətilə bütün Tovuz camaatını və bu yolda əməyi olan hər kəsi ürəkdən təbrik etmək, sevinmək zamanıdır.

İLKİN SULTANLI