Qorxma, AFFA, qorxma! - KÖŞƏ

AFFA-da deyəsən lisenziya paylanan mövsümdür. I Liqada çıxış edən “Baku Sportinq”, “Difai”, “Şəfa”, “Səbail” və “Mingəçevir”in əlinə sənədlərini verib yola salıblar.

İndi adamı tək bir sual düşündürür. Bu qədər kluba "yaşıl işıq" yandıran qurumun Premyer Liqa qapılarını taybatay açıb komanda sayını 14-ə qaldırmağa yetərincə cəsarəti varmı? Yoxsa yenə eyni "dar çərçivə"də fırlanıb özümüzü aldadacağıq?

Cari mövsümdəki 12 komandalı format sübut etdi ki, futbolumuz bir az nəfəs almağa başlayıb. Mövcud tempin üstünə qoyub çempionatın dadını-duzunu artırmağın əsl vaxtıdır. AFFA rəsmiləri hər dəfə yenilikdən söz düşəndə infrastruktur yoxdur bəhanəsinə sığınırlar. Halbuki istəyən üçün çıxış yolu tapmaq çətin deyil.

Məsələn, “Səbail” Bayıldakı doğma meydanında qala bilər. “Şəfa” isə "SOCAR Polymer Arena" variantı ilə elitaya fərqli rəng qatar. “Baku Sportinq”ə gəlincə, "Dalğa Arena" və ya "Baku Arena" kimi seçimlər var. Onlar öz stadionları hazır olana qədər bu arenalardan birində başlarını girələyərlər.

Region tərəfə baxanda da vəziyyət ümidvericidir. “Mingəçevir” qayıtsa, o boyda şəhər yenidən böyük futbolla nəfəs alar. Onlar arenaları tam düzələnə kimi qonşuluqdakı Yevlaxa gedib-gələrlər. Ağsu təmsilçisi olan "Difai"nin turnir vəziyyəti acınacaqlıdır və bu nəticələrlə onların elitaya yüksəlməsi nağıl kimi görünür. Sənədləri yəqin ürəkləri qırılmasın deyə təsdiqləyiblər.

Yeri gəlmişkən, baş katib Cahangir Fərəcullayev Hesabat Konfransında bəyan etmişdi ki, Ağsu stadionu Premyer Liqa səviyyəsinə gətiriləcək. Həmin meydança vəd olunduğu kimi hazır olacağı təqdirdə obyekti müvəqqəti “İmişli”yə vermək olar. Beləcə həm arena boş qalmaz, həm də futbol coğrafiyamız genişlənər.

Amma biz daha ciddi məsələlərdən danışırıq. AFFA tərəddüdü kənara qoyub ən optimal variantı seçməlidir. Premyer Liqadan heç bir klub aşağı düşməməli, əvəzində I Liqadan həm lisenziyası qaydasında olan, həm də idman nəticəsi qazanan iki komanda yuxarı qalxmalıdır.

İndi kimsə çıxıb idman prinsipləri pozular deyəcək. Vallah, gülməlidir. Onsuz da o prinsiplər hər addımda tapdalanır. Baxın, “Karvan-Yevlax” bu gün bəlkə də turnir cədvəlinin dibindədir. Lakin bu klubun maliyyəsi yerində, infrastrukturu qaydasındadır. AFFA-nın verdiyi möhlət müddətində öz işlərini qaydasına saldılar. İndi belə bazası olan bir kollektivi sırf sonuncu oldu deyə aşağı göndərmək nə dərəcədə məntiqə sığır?

İdman prinsipləri pozulur? Bəs bir komandanın dörd dəfə stadion dəyişməsi nədir? Bəs pley-off matçının absurdluğu? Premyer Liqada legioner məhdudiyyəti yoxdur, amma I Liqa təmsilçisinə yeddi nəfərdən artıq əcnəbi olmaz deyirlər. Belə bərabərsizliyin hökm sürdüyü yerdə elitada qalmağa çalışanla aşağıdan gələn lisenziyalı ikinci yeri pley-offda üz-üzə qoymaq elə əsl ədalətsizlikdir.

Sözün qısası, qorxmağa gərək yoxdur. Azərbaycan futbolu o dörd divarın içində çox boğuldu. 14 komandalı çempionat həm sabitlik gətirəcək, həm də rəqabət!

İLKİN SULTANLI