Bu, hakimlikdir, yoxsa haqq yemək? - YAZI

"Zirə" - "Neftçi" matçında yaşananlar rəsmən rüsvayçılıqdır. İndi hamı Rəhim Həsənovun bu biabırçılığa necə bəraət qazandıracağını gözləyir. Çoxu ofsayddan danışır, Ruan Renatonun Kenan Piriçə mane olub-olmadığını müzakirə edir. Amma əsl məsələ başqadır.

Gəlin, hücumun başladığı ana qayıdaq. Tiaqo Silva ötürmədə səhv edir, "Neftçi" əks-hücuma çıxır. Qapıçı sürüşərək topu götürür. Bəs sonra? Portuqaliyalı futbolçu İnqilab Məmmədovun düz gözü önündə Abubakarın ayağına təpik vurur. Referi isə elə bil meydanda yoxdur! Fit çalınmır, oyun davam edir və "Zirə" qol vurur.

Mənə bir şey maraqlıdır. Necə oldu ki, İnqilab Məmmədov o təpiyi görmədi? Yaxşı, tutaq ki, görmədi. Bəs o "nümunəvi" VAR hakimi Nicat İsmayıllı hara baxır? Niyə hücumun əvvəlindəki aşkar qayda pozuntusu ilə bağlı İnqilaba məlumat vermədi?

Hörmətli Rəhim Həsənov! Yəqin yenə hansısa qaydanı tapıb, Komitə olaraq hakimləri "sudan quru çıxaracaqsınız". Bəs o təpiyə nə ad verəcəksən? Bu, futbolçunun ayağına qəsdən vurmaq deyil? Tiaqo Silva ən azı sarı vərəqə almalı deyildi?

Bunun tək adı var: Hakimlər "Neftçi"nin haqqını rəsmən yeyiblər. İndi növbə yenə səndədir, Rəhim Həsənov! İnqilab Məmmədovla Nicat İsmayıllını da qat Əliyar Ağayevlə Cavid Cəlilovun sırasına. Onları da 5-6 oyunluq cəzalandır ki, ağılları başlarına gəlsin. Çünki onların etdiyi hakimlik deyil, haqq yeməkdir. Vəssalam!