Təslim olmaq yoxdur: "Karvan-Yevlax"ın "ağ bayraq"sız "Şamaxı" imtahanı - YAZI
Premyer Liqanın 28-ci turunda "Karvan-Yevlax" bu gün "Şamaxı" ilə üz-üzə gələcək. Klub hazırda 11 xalla turnir cədvəlin zirzəmisindədir. "Qəbələ" onlardan bir pillə öndədir. "Qırmızı-qaralar"ın hesabında 19 xalı var. Çempionatın sonuna isə cəmi 6 tur qalıb.
Futbolla maraqlanan çoxu artıq hökmünü verib. Hamı deyir ki, Yevlax uşaqlarının işi bitdi, gələn il elitada olmayacaqlar. Amma kənardan baxan kəs ancaq rəqəmlərə fikir verir. Cədvəldəki yer başqadır, meydanda vuruşmaq tam başqa.
Düzdür, statistika heç də xoş deyil. Yevlaxlılar bu il cəmi iki qələbə qazanılıblar və hər iki oyunda da rəqib "Kəpəz" olub. Komanda digər matçlarda da can qoyub, amma nədənsə alınmayıb.
Ancaq tək can qoymaqla iş aşmır. Vuruşmaq yaxşıdır, amma o uşaq səhvləri hər şeyi korlayır. Oyunun taleyi həll olan yerdə diqqət niyə dağılır? Qol vurmaq lazım gələndə ayaqlar niyə dolaşır? "Döyüşürük" deyib rəqibə xal paylamaqla hara gedirik? Savaşmaq şərtdir, amma meydanda bir az da ayıq-sayıq olmaq lazımdır. Yevlax təmsilçisi geri çəkilmir, lakin hücumda soyuqqanlı deyil. Bu artıq xarakter yox, birbaşa sistem xətasıdır.
Yenə də bir həqiqət var: "Karvan-Yevlax" hələ "ağ bayraq" qaldırmayıb. Məğlub ola bilərlər, xal itirərlər, amma meydandan heç vaxt ruhsuz çıxmırlar. Rəqiblərin büdcəsi böyük, heyəti ulduzla dolu ola bilər, amma bu uşaqların heç kimdə olmayan inadı var.
"Şamaxı" ilə matç xarakter sınağı olacaq. Meydanda hər qarış üçün dirəşmək, son saniyəyə qədər o əzmkarlığı göstərmək şərtdir. Yevlax futbolunun hələ nəfəs aldığını sübut etmək üçün bu oyun böyük şansdır. Taleyi ilə barışan tərəfdən onsuz da xeyir gəlməz. "Ağ-qaralar" hələ ki bu qismətlə razılaşmaq fikrində deyil. Liqadan düşmək qaçılmaz görünə bilər, amma daxili ruh ölməyibsə, bu hələ son deyil.
MƏHƏMMƏD HÜSEYNOV
