AFFA-nın görmədikləri: Hakimlər "Zirə"ni necə "dartırlar"? - 5 FAKT

Hər mövsümün sonunda avrokubok davası qızışanda eyni söhbət ortaya atılır: "Hakimlər filan klubu "dartır".

Ötən il hədəfdə "Araz-Naxçıvan" idi, iki mövsüm öncə isə "Sumqayıt". Bu iddiaları yayan da biz idik: media, azarkeşlər, futbol camiəsi. Lakin bu il qəribə bir səssizlik var.

​Ortada sükut olsa da, əlimizdəki faktlar "hakimlər "Zirə"ni "dartır" deməyə kifayət edir. Gəlin, saymağa başlayaq:

​7-ci tur, "Zirə" - "Neftçi": Hesab 2:1 qonaqların xeyrinədir. Matçın doxsanıncı dəqiqəsində Qismət Alıyev cərimə zərbəsindən qapı istiqamətinə ötürmə edir. "Neftçi" müdafiəçiləri topu uzaqlaşdırır. Topun arxasınca qaçan Ayron Qomis Alessio Kurçiyə qarşı qaydanı pozur. Amma Kamal Umudlu oyunu davam etdirir. Epizodun davamında Elvin Bədəlov Ceyhun Nuriyevə qarşı kobud oynayır. Hakim oyunu yenə davam etdirir. VAR müdaxilə edir və penalti qərarı verilir. Lakin təqdim edilən videoda Qomisin Kurçiyə qarşı kobud oynadığı epizod göstərilmir.

​11-ci tur, "Zirə" - "Turan Tovuz": Matçın 45-ci dəqiqəsində Brahim Konate mübahisə anında Roderik Millerə kəllə atır. Əliyar Ağayev ona dərhal qırmızı vərəqə göstərir. İnqilab Məmmədov referini VAR-a çağırır. Bundan sonra Ağayev "qırmızı"nı "sarı" ilə əvəz edir.

​Azərbaycan Kubokunun yarımfinalı, "Turan Tovuz" - "Zirə": Matçın 35-ci dəqiqəsində Ruan Renato cərimə meydanında Xorxe Silva ilə ikili mübarizədə qaydanı pozur. Əliyar Ağayev oyunu davam etdirir. VAR hakimi Cavid Cəlilov onu epizodu izləməyə dəvət etsə də, referi qərarında qalır. Amma çempionatın və ya kubokun digər matçlarında hakimlər eyni epizodu penalti olaraq dəyərləndirmişdilər. Hakimlər Komitəsi də hakimin səhv qərar verdiyini açıqladı.

​Eyni matçın 70-ci dəqiqəsi: Qismət Alıyev Roderik Millerin ayağını tapdalayır. Yenə Əliyar Ağayev oyunu davam etdirir. Bu dəfə Cavid Cəlilov referini VAR-a dəvət etmir. Qarşılaşmadan bir neçə gün sonra Hakimlər Komitəsinin sədri Rəhim Həsənov qərarın səhv olduğunu açıqlayır.

​28-ci tur, "Zirə" - "Neftçi": Görüşün 90+4-cü dəqiqəsində Brahim Konate hesabı bərabərləşdirir. Epizod zamanı açıq-aşkar görsənir ki, Ruan Renato oyundan kənar vəziyyətdədir və qapıçı Kənan Piriçə mane olur. Amma İnqilab Məmmədov oyunu davam etdirir. VAR hakimi Nicat İsmayıllı baş hakimi epizodu izləməyə dəvət etmir.

​Bu mövsüm 5 vacib görüşdə hakimlər "Zirə"nin xeyrinə qərarlar veriblər. Özü də avrokuboklara namizəd əsas rəqiblərlə görüşlərdə. Bu, "dartmaq" deyil, nədir? AFFA etiraz edən klub rəhbərlərini cəzalandırmaq əvəzinə bu epizodları araşdırmalıdır. Görəsən, hakimlər niyə "Zirə"yə rəğbət bəsləyirlər? Rəşad Sadıqovdan qorxurlar, yoxsa Orxan Məmmədovun mümkün gedişinin qarşısını alırlar? Həyatdır, hər şey mümkündür...

​İLKİN SULTANLI