Mundiallar tarixində ilk - İnfantino açıqladı

FİFA prezidenti Canni Infantino 2026-cı il dünya çempionatı ilə bağlı diqqətçəkən açıqlama verib.

Sport1.az "Goal"a istinadən xəbər verir ki, o, mundiallar tarixində ilk dəfə final oyununda fasilə zamanı musiqili şou təşkil olunacağını bildirib.

İnfantinonun sözlərinə görə, iyulun 19-da "MetLife Stadium"da keçiriləcək həlledici qarşılaşmada azarkeşlər böyük səhnə proqramının şahidi olacaqlar: “Tarixdə ilk dəfə olaraq dünya çempionatının finalında fasilə zamanı şou olacaq. Hələlik çıxış edəcək ifaçıların adlarını açıqlaya bilmərəm, amma birdən çox sənətçi olacaq. Bu, yer üzündəki ən möhtəşəm şou olacaq”.

Qeyd edək ki, DÇ-2026 ABŞ, Kanada və Meksikada təşkil olunacaq.