MOK-da xüsusi mərasim: Olimpiya medalları yeniləri ilə dəyişdirildi
Milli Olimpiya Komitəsində Azərbaycan idmançıları – Qaşım Maqomedov və Həsrət Cəfərov üçün xüsusi mükafatlandırma mərasimi təşkil olunub.
Sport1.az xəbər verir ki mərasim Paris 2024 Yay Olimpiya Oyunlarında qazanılan medalların sonradan zədələnməsi və keyfiyyətini itirməsi səbəbindən onların yeniləri ilə əvəz olunması münasibətilə keçirilib.
Komitənin inzibati binasında baş tutan tədbirdə hər iki idmançıya yeni medallar rəsmi şəkildə təqdim edilib.
Qeyd edək ki, Paris-2024-də mükafat qazanan 7 Azərbaycan idmançısından 5-nin medalında sonradan aşınma və dəyişiklik müşahidə olunub. Yalnız cüdoçu Hidayət Heydərov (73 kq) və sərbəst güləşçi Maqomedxan Maqomedov (97 kq) bu problemlə üzləşməyib.
Digər mükafatçılar – cüdo üzrə çempion Zelim Kotsoyev (100 kq), taekvondoçu Qaşım Maqomedov (58 kq), boksçu Alfonso Dominqes (92 kq), yunan-Roma güləşçisi Həsrət Cəfərov (67 kq) və sərbəst güləşçi Giorgi Meşvildişvilinin medallarında isə nəzərəçarpacaq keyfiyyət itkisi qeydə alınıb.
