Vernidub "Neftçi" üçün yeni sistem formalaşdırıb - YAZI

"Neftçi" ardıcıl 3-cü Premyer Liqa matçında qələbə qazanır. Qəribədir? Xeyr! "Neftçi" yenidən öz kimliyinə dönür. İllərdir azarkeşlərin həsrətində olduğu oyun fəlsəfəsi artıq meydanda hiss olunur. 

Yuri Vernidub sükan arxasına keçəndən sonra komanda özünü yenidən tapdı. 11 rəsmi oyunda cəmi 1 məğlubiyyət. Bu, təsadüf deyil. Sistemdir, intizamdır, geri dönüşün başlanğıcıdır.

"Sumqayıt"la matçda Emin Mahmudov iştirak etmirdi. Çünki kapitan zədəli idi. Əvvəllər belə hallar olanda "Neftçi" xal itirər, digər məşqçilər dərhal bunu bəhanə edərdilər. İndi isə vəziyyət dəyişib. Emin yoxdur? Emil var, Metyü var! Onlar yoxdur? Problem deyil! Elvin var, Kuç var! Yəni, artıq "Neftçi" 1 nəfərdən asılı komanda deyil. Vernidub kollektiv oyuna üstünlük verən sistem formalaşdırıb. Bu da flaqmanın xeyrinə olan məqamdır.

"Sumqayıt"la oyundan sonra deyilən sözlər isə rəqiblər üçün mesajdır:

"Uşaqlara demişəm ki, ağır aprel ayı var. 5 oyunumuz olacaq və ardıcıl güclü rəqiblərlə oynayacağıq. Bu, əladır. Bu oyunları səbirsizliklə gözləyirəm. Komandamın nəyə qadir olduğunu görmək istəyirəm. Bu matçları bir nəfəslə keçə bilsək, yaxşı olacaq".

Yəni, "Neftçi" heç kimdən geri qalmır. İlk 4-lük? Artıq "Neftçi" əsas rəqiblərini məğlub edəcək gücdədir. Qarşıda 8 oyunluq marafon var. Flaqman bu tempdə davam etsə, fərq qapanacaq. Artıq rəqiblər bu təzyiqi hiss edirlər.

MƏHƏMMƏD HÜSEYNOV