Qattuzo üzr istədi
İtaliya millisinin baş məşqçisi Cennaro Qattuzo komandasının 2026-cı il dünya çempionatına vəsiqə qazana bilməməsinə görə üzr istəyib.
Sport1.az xəbər verir ki, italiyalılar mundialda iştirak hüququ uğrunda A yolunun final pley-off matçında Bosniya və Herseqovina milli komandası ilə qarşılaşmada uduzublar (1:1, 1:4 penaltilər seriyası).
“İtaliyanın qarşıdakı dünya çempionatına vəsiqə qazana bilməməsinə görə şəxsən üzr istəyirəm. Lakin futbolçularımız meydanda əllərindən gələni etdilər. Oyunun böyük hissəsini azlıqda keçirdiyimiz üçün əziyyət çəkdik və oyunu üstün bitirə bilmədik”, – deyə Qattuzo vurğulayıb.
Qeyd edək ki, italiyalılar sonuncu dəfə dünya çempionatında 2014-cü ildə iştirak ediblər. Onlar ilk dəfədir ardıcıl 3 mundialı kənardan izləyirlər.
