"Qarabağ”ın ulduzu diqqət mərkəzində – La Liqa təmsilçisi 12 milyonluq plan qurur
“Qarabağ”ın Çempionlar Liqasındakı uğurlu çıxışı komandanın futbolçularına olan marağı xeyli artırıb.
Sport1.az xəbər verir ki, xüsusilə hücum xəttində effektiv oyunu ilə seçilən Kamilo Duran bir sıra klubların diqqətini cəlb edib.
24 yaşlı kolumbiyalı forvardın karyerasını İspaniyada davam etdirmək ehtimalı yaranıb. Sosial mediada yayılan xəbərlərdə onun La Liqa təmsilçisi “Jirona”nın maraq dairəsinə düşdüyü bildirilir. Hələlik tərəflərdən rəsmi açıqlama verilməsə də, müxtəlif mənbələr bu iddianı təsdiqləyir.
İddialara əsasən, İspaniya klubu yay transfer pəncərəsində “Qarabağ”a rəsmi təklif göndərə bilər. “Jirona”nın futbolçu üçün təxminən 12 milyon avro ödəməyə hazır olduğu vurğulanır.
Qeyd edək ki, Duran ötən yay “Qarabağ”a Portuqaliyanın “Portimonense” klubundan transfer olunub və onun müqaviləsi 2028-ci ilin yayına qədər qüvvədədir.
