"İstəyərdim ki, "beşlik"də olmayan komandalardan kubokda irəliləyənlər olsun, daha maraqlı alınsın" – Ayxan Abbasov

"Şamaxı" Misli Premyer Liqasının 21-ci turu çərçivəsində "İmişli" ilə qarşılaşıb. Matç qolsuz bərabərliklə yekunlaşıb.

Sport1.az xəbər verir ki, qonaqların baş məşqçisi Ayxan Abbasov matçdan sonra keçirilən mətbuat konfransında oyun barədə fikirlərini bölüşüb.

Mütəxəssis rəqibin müqavimətini qırmağın asan olmadığını və komandaların bərabər səviyyəli mübarizə apardığını bildirib:

"Çətin oyun olacağını əvvəlcədən bilirdik, futbolçularımız meydanda çox əziyyət çəkdilər. Oyunun gedişatına nəzər salsaq, hər iki komandanın bir xala layiq olduğunu görərik. Təhlükəli epizodlar, əsasən, standart vəziyyətlərdən yarandı".

A.Abbasov müdafiə xəttindəki müsbət dəyişikliklərə və komandanın son oyunlardakı performansına da toxunub:

"Sevindirici haldır ki, artıq iki oyundur qapımızda qol görmürük. Cari mövsümdə bizim üçün ən vacib amillərdən biri məhz bu idi, oyunumuzu bu yöndə inkişaf etdirmək istəyirdik. Əvvəlki matçlarda çox vaxt sadə səhvlərdən qollar buraxırdıq. İndi isə müdafiədə daha etibarlı təsir bağışlayırıq və bu tendensiyanı davam etdirməyə çalışacağıq".

Mütəxəssis komandanın qarşıdakı hədəflərindən və futbolçuların fərdi inkişafından da söz açıb:

"İlin əvvəlində futbolçularıma tapşırmışdım ki, hər kəs öz karyerasını göz önünə gətirsin və pik nöqtəyə çatmağa çalışsın. Məsələn, kimsə ötən mövsüm 7 qol vurubsa, bu il həmin sayı 9-a çatdırsın və ya oyun sayını artırsın. Hazırda bəzi oyunçularımız karyeralarının ən yaxşı dövrünü keçirirlər".

Təcrübəli məşqçi Azərbaycan kubokundakı iddialarını gizlətməyib:

"Kubokda iddialıyıq, konkret hədəflərimiz var və mübarizəni sona qədər davam etdirmək istəyirik. Rəqibimiz güclüdür, bizi çətin sınaq gözləyir. Lakin ilk oyundakı nəticə bizə şans verir ki, sona qədər döyüşək. Futbolçularımda lazımi hədəf və idman hirsini görürəm. Kubokun cari mövsümündə ilk "altılıq"da yer almayan komandalar da iddialıdır. İstər "Qəbələ"nin, istərsə də bizim irəliləmək şansımız var. Çox istərdim ki, beşlikdə olmayan komandalar kubokda daha irəliyə getsinlər, bu, turniri daha maraqlı edərdi".

Baş məşqçi son zamanlar ölkə futbolunda müzakirə olunan hakimlik və infrastruktur məsələlərinə isə özünəməxsus şəkildə toxunub:

"Məncə, son oyunlarda baş verənlərdən sonra hakimlik haqqında nə isə danışmaq yersizdir. Hər şey deyilib, mən buna əlavə nə edə bilərəm ki? Sadəcə, sevindirici haldır ki, bir problemi də biz həll etdik. Sən demə, futbol qapılarından biri digərindən 11 sm hündür imiş. Bu gün futbolumuza xeyrimiz dəydi və nəhayət, qapılar standart ölçülərə gətirildi".