Böyük klublar kiçik düşüncəli çıxışlara qalib gəldilər - YAZI

Son günlər Premyer Liqanın 21-ci turunun "Neftçi" - “Qarabağ” oyunu ətrafında yaranan müzakirələr artıq futbol çərçivəsini aşmışdı.

Lakin bu məsələ yalnız klublar, AFFA və PFL arasında idman prinsipləri əsasında həll olunmalı idi. “Köhlən atlar” sıx oyun qrafikini əsas gətirərək qarşılaşmanın təxirə salınmasını istədi. “Ağ-qaralar” isə çempionatın plan üzrə davam etməsinin tərəfdarı idi. Hər iki mövqe idman baxımından anlaşılan idi. Burada nə qorxu, nə də başqa məna axtarmaq üçün əsas yox idi.

Amma bəzi şəxslər vəziyyətdən istifadə edərək kütləyə oynamağı üstün tutdular. Sosial şəbəkələrdə və mediada “Neftçi" "Qarabağ"dan qorxur”, “Neftçi" paxıllıq edir”, “Neftçi" adlı komanda tanımıram”, “Neftçi"də işlədiyim üçün peşmanam” kimi ifadələr səsləndirildi. Bu cür sözlər nə tənqiddir, nə də obyektiv fikir. Bu, açıq şəkildə qarşıdurma yaratmaq və diqqət qazanmaq cəhdi idi.

Tənqid etmək, fərqli mövqe bildirmək olar. Amma klubu aşağılamaq, onun adını belə inkar etmək artıq sağlam idman müzakirəsi deyil. Bu, reytinq və alqış xatirinə edilən çıxışdır. Futbolda meydandakı mübarizə danışmalıdır, emosional və təhrikedici şüarlar yox.

Unudulan bir məqam da var: "Neftçi" ölkəmizi Avropa arenasında layiqincə təmsil edib, UEFA Kubokunun qrup mərhələsinə vəsiqə qazanan ilk Azərbaycan klubu olub. O zaman bu komandanı alqışlayanlar indi necə olur ki, onun adını belə tanımadıqlarını deyirlər?

İndi isə "Qarabağ" Azərbaycan futbolunun ən uğurlu tarixini yazır. Zarafat deyil, Ağdam təmsilçisi Çempionlar Liqasının pley-off mərhələsinə vəsiqə qazanıb. Burada "Nyukasl" kimi bir rəqiblə üz-üzə gələcək. Sanki yuxudayıq.

İndi belə məqamda "Neftçi" və "Qarabağ"ı qarşı-qarşıya qoymaq yox, onların tarixini və çəkisini dəyərləndirmək lazımdır.

Qarşılaşma təxirə salındı. Çünki "Qarabağ”ın prezidenti Tahir Gözel rəsmi şəkildə “Neftçi”dən bu addımı atmaqlarını xahiş etdi. Flaqman da bu istəyi yerə salmadı. Bax, bu, əsl Azərbaycan futboluna yaraşan hərəkət idi. Tahir Gözel də flaqman rəhbərliyinə buna görə təşəkkür etdi. Bu fakt göstərdi ki, bəzi vacib məsələlər emosiyalarla deyil, qarşılıqlı hörmət və dialoqla həll olunur.

Futbolda intriqa, rəqabət gözəldir. Amma bunu düşmənçiliyə çevirmək lazım deyil. Güclü çıxış etmək istəyənlər bunu ucuz sözlərlə yox, sağlam arqumentlərlə etməlidirlər.

Azərbaycan futbolunda tarix yazan "Neftçi" və "Qarabağ" arasında düşmənçilik yaratmaq lazım deyil. Çox şükür ki, hər iki klubun rəhbərliyi ucuz fikirlərə baş qoşmadılar. Böyük klublar kiçik düşüncəli çıxışlara qalib gəldilər.

MƏHƏMMƏD HÜSEYNOV